15 alfo yaqrotho Dacış kmibıc dmınqoli l’maşritho dkıtyo qaruto l’Şigur

Hfite, qoyume u folitiqoye Iraqoye mzaharlın mi tahrazto di şultonutho d’Boğdod dkıbco dnıqlo zıd m’30 alfo marıhbone dı Dacış cama yaqrothaththe l’maşirtho dkıtyo qaruto li fnitho d’Şigur.

 Callathe, a’mşale da Yezidoye mahwelın hfuxyo u mawdaclın dkıtlın zuctho dmisım şuhlofo demoğrafoyo bi fnihaththe d’Şigur.

 İ rişathkarxutho di qastra d’Xansur bi fnitho d’Şigur Rana Qaski, bi maqırhonutho dhula li dafo d’Pukmedia, mawdacla mbayn 30 alfo marıhbone dı Dacış cama yaqrothaththe, kito ucdo 15 alfo menaye xıd grub qadmoyo nqili l’maşritho dkıtyo bayn di qastra d’Alrabica wi qastra d’Alzummar qariwo mi fnitho d’Şigur bu garbiyo du Iraq.

Qaski mzaharla ma marıhbone dhawın ucdo qariwe mi fnitho d’Şigur dsımwo eba qtolcamo i şato da 2014, krıhlaste u medano u mawdacla dlayto iqoro la reğşe da Yezidoye. Bebzabno, Qaski mawdacla da marıhbone dınqili li maşritho baynothaye kito Iraqoye m’hiğmonwotho mşahılfe, ubaynothayeste nuxroye m’ğer athrawotho ne.

Qaski mathkarla ste da Yezidoye ruşmoyith heş lımmawdaclın i klaytaththe mqabıl di maşrithathe, cal dkıtlın sabro dhowe baynothaye yasire ma Yezidoye, dilonoyith cal di maşritho d’Alhol bu garbay madınho d’Suriya mqafewo eba menyono d’yasire Yezidoye.

Camgabıdathe, hın qoyume mi hiğmonutho d’Ninwe sımlın sturyo u parlamento du Iraq wi mdabronutho folhoyto du gayso, cal dsim baytoyutho la grubani dı Dacış bi hiğmonutho d’Ninwe.

M’gabo hreno, u mşalo du tboco froso du huyodo athronoyo d’Kurdistan bı Mawsal Ğayyath Alsoraji, mzaharle mi maşrithathe dıksaymo baytoyutho l’marıhbone m’ğensıwotho mşahılfe, u mawdacle da mşatsone di maşrithathe lımyaqarlın a’debhe da Yezidoye.

Bebzabno, Alsoraji sımle qroyto li şultonutho d’Boğdod dnıqlo a’marıhbonani l’fenyotho hrene bu Iraq, bnişo dlowe qetre u şğuşye baynothaye ubayn da came di duktho.