1500 mdinoye mgalwelın ma dukothathe me fothıd da hçome dıkseymo Turkiya

Mcal fothe da hçome dıksaymi a hayle kaboşe d’Turkiya calu garbyo du Iraq, mgalwele hol 1500 comure ma dukothathe. İ mawdconuthathe d’tukoso Mşihoyo dıkfolıh leşan u şlomo bu qlimo d’Kurdistan’yo.

Bebzabno mawdıc, dımşakıl Sictho dilonoyto b’Nuhadra, dgıhayro calu tazminat dıklozım dmitahwe lkull farsufo dhzele husrono ba hçomani dsımla Turkiya cali hiğmonutho.

Bu zabno du rişqutno d’Turkiya kımzahır dgımdawım a hçomayde calu garbyo du Iraq ucalu garbyo d’Suriya leşan dmatım u gerilla di PKK, u tukoso Christian Peacemaker Teams-Iraqi Kurdistan, frısle maqırhonutho u grışle u zuhoro calu husrono dhawi ba qıryawotho di hiğmonutho d’Nuhadra mcal fothe da hçomani da hayle kaboşe d’Turkiya .

Bi maqırhonuthathe u tukoso Mşihoyo rızle a hawbe dsımle u gayso d’Turkiya wu husrono dhuwle lan arcotho ucala mulkone da comure da qıryawotho d’Nuhadra u m’akadla, dhol 1500 bnaynoşo jbiri dmahzımi ma dukothathe bu zabno dan 40 yawme dıkmdawmi a cuqobani d’Turkiya wu mınyono da nuqazyotho dmarkawla bu qlimo leşan dımdawmo ahçomayda.

Camgabe da hçomaniste, a hayle Turkoye kıquşci a dawme da turone uda cobe dkito bu qlimo d’Kurdistan. Cali sbuthatheste u rişqutno du Iraq Berham Salıh, bqaşyutho krıhle u tehriwo du mahduro d’Nuhadra. Salıh mırle; Turkiya kıdayşo lo belhude i morutho du Iraq, elo kımahrıwo a turonaydan u kımaşyoste cnufyo lo noşoyo u kıturyo a bnaymothoyaydan dmahzımi ma dukothathe.

Calu husrono dıkturyo Turkiya cala qıryawotho d’Nuhadra, mawdıc dımşakıl Sictho dilonoyith bi hiğmonutho leşan dhayro calu tazminat dıklozım dmitahwe la cumure dhzelın husrono ma hçomano dıksaymo Turkiya calu gerilla di PKK. A hadome di Sicthathe’ste gıdkurxi b’Nuhadra; beynothaye a qıryawotho du camaydan xıd Kesta, Chalki uğer leşan dmitahwe tazminat la comurathe.

Elo Turkiya, lo belhude kısaymo cuqobe calu garbyo du Iraq, elo kıqutcoste a maye da nahre bu Iraq u b’Suriya wu kıturyo u camo bı bsirutho rabtho da maye. Calathe a mşale Iraqoye mabdelın ucdo droşe cam Suriya u bıthırste camu İran ubi harayto cam Turkiya, bnişo dımsafın u şwolano da maye.