20 mşale folitiqoye d’Australia mdelın i egartho dhowe mawdyonutho bu qtolğenso da 1915

20 mşale folitiqoye d’Australia mdelın egartho hreto, u tlıblın mu rişwazire u mi şultonuthayde dmawdın bu qtolğenso dsımwo ban 1915 cala Mşihoye dıkhoyanwo bi mamlaxtho da Cuthmanoye.

İ egarthathe mıdyo me wazire, hadome du parlamento u senatore d’Australia dkıtne me gabe frişe du athro u tlıbbe mu rişwazire Skott Morrison dmıctarıf bu qtolğenso dsim calan Armınoye, Suryoye Othuroye u Yawnoye.

Bi egarthathe d’mıdyo me 20 Senatore, hadome du parlamento u wazire me gabe folitiqoye frişe d’Australia, bşıkıl rwıho mahke calu qtolğenso sistematik u barbroyo dsımwola i mamlaxtho da Cuthmanoye calan Armınoye, Suryoye Othuroye u Yawnoye bu zabno du qrobo qamoyo dbritho.

Bi egarthathe a mşale folitiqoye d’Australia, mawdaclın ilo thnihuthathe lu rişwazire Scott Morrison cal dlo mawdele bu qtolğenso dan 1915 udlo mıstacmele i meltho du qtolğenso bu zabno du mamlo dsımwole bu duxrono şatonoyo du qtolğenso dan Armınoye 24 bu yarho d’Nison d’şafıcina.

Calathe ucdo a mşale folitiqoye d’Australia, mqadamlın egartho hreto lu rişwazire uli şultonuthayde, dmawdın bu qtolğenso dan 1915 u mırlın; Australia xıd athro qamoyo dımqadamwole mcadronutho noşoyto la Sohude ula yatume du qtolğensano, caybo rabo’yo di şultonuthaydan ucdo kımdawmo drıfdo dmawdıyo ebe.

Bi egartho mawdıc; Bu mamlayde Scott Morrison lo m’akadle u karakter da hawbe barbroye u sistematik dsimiwo ban 1915 cal milyon u falge d’Armınoye uhol milyon d’Suryoye Othuroye u Yawnoye. Morrison-huwe bu zabno dkıtwe qoyumo ba 2011, sımwole qroyto li şultonutho du zabnawo dmawdıyo bu qtolğensano.

İ senatore Kristina Keneally’ste mırla; Lhiqoyto’no u kıtli sabro rabo dgıdothe yawmo, d’Australia gawonoyith-dmaydo duktha cama 30 athrawotho hrene dmawdelın bu qtolğensano. Ğer mşale folitiqoye’ste grışlın u zuhoro bi egarthathe, cala qroyotho dsımlın ğalabe şutose u tukose, folitiqore d’Australia, leşan i mawdyonutho bu Sayfo dan 1915.