200 qıryawotho maxlın bu garbiyo du Iraq

Bi netiçe du qrobo qaşyo dkımdawım bayn du gabo da falohe d’Kurdistan di PKK wu gayso kaboşo dı Turkiya, 11 qıryawotho hrene du camaydan dkıtne bi hiğmonutho d’Nuhadra bu garbiyo du Iraq maxlın ma comuraththe.

Gawonoyith bi netiçe du qrobo dhawi bayn di PKK u Turkiya, maxle hul ucdo ba mowat d’qıryawotho bu garbiyo du Iraq, u hawi hsurono momunoyo dıkmote l’milyare dinore.

İ mdabronutho gawoyto di hiğmonutho d’Nuhadra du garbiyo du Iraq, bi maqırhonutho dhula lumıhreno li dafo d’Bas News, mawdacla dmaxle 17 qıryawotho hrene ma comuraththe, bi netiçe da taxtuşe qaşye dkımdawmi bayn du gabo di PKK wu gayso dı Turkiya.

Gawonoyith mi naqla dımşarele u qrobo bayn di PKK wu gayso kaboşo dı Turkiya, maxle bu noquso 200 qıryawotho ma comuraththe bi hiğmonutho d’Nuhadra, ubebzabno hawi husrono momunoyo dıkmote l’ışto milyare dinore Iraqoye.

U qrobano u qaşyo mahıtle a’qıryawotho dkıtne calu thumo dı Turkiya bi dayira du qento, ub’şıkıl yawmonoyo kmitahwe husrono la mulkone da comure qıryawotho, la bıstonaththe, la qatcaththe ula n’arcothaththe di zaricutho.

Hın ma comure wa mşale d’Nuhadra bi maqırhonutho dhulın l’Bas News, mawdaclın d’17 qıryawotho hathe bi qastra dı Darkar bi mditho d’Zaxo maxlın ma comuraththe, baynothaye 11 qıryawotho du camaydan ne.

Bu garbiyo du Iraq kito 245 citotho dkımşabli zıd m’300 alfo farsufe mu camaydan dıkhoye bu qlimo d’Kurdistan uba fenyotho di daşto d’Ninwe.

Bi hiğmonutho d’Nuhadra dıkrıhqo balhude 10 kilomıtre ma thume dı Turkiya, kiba bu noquso 100 qıryawotho du camaydan.