7 mu camaydan marfın mu hbuşyo bu İran

Beyn da 85 alfo bnaynoşo dmarfın ma hbuşye frişe du İran, kito 7 man abne du camaydan.

 I şultonutho d’Tehran, fsıqwola meqım kımo yawme dmarfiyo a 85 alfo hbişoyani mcal fothe du pandemi du virus d’Corona.

Lfuth u mluo da 18 du nomuso esonoyo du İran, fsıqwola i şultonutho du athro dmarfıyo ba casro alfayo dıhbişoye, xıd tedbir mqabıl du virusano d’Corona. Beyn da 85 alfo hbişoye dmarfanwo meqım kımo yawme, ucdo mawdıc dkıtwo beynothaye 7 man abne du camaydanste.

Hın manabne du camaydan marfın leşan zabno uğerste marfın bnaqla hıdo u ha menayeste Ramiel Bet Tamraz’yo dkıtyo cımre 35 eşne. I hotho Dabrina Bet Tamraz m’akadla u terfiyo du ahunayda li dafo d’Al Carabiya u mırla; ğalabe fsihoyena dkıtyo ucdo Ramiel hiro u bu baytayde. Kıtulbina me Aloho, dımhafıd cala hbişoye hrene kulle.

Ahbuşye bu İran malyene hbişoye u calathe kito qento rabo, dımdawım dtofe u virusano d’COVİD-19 zıttır u dilonoyith bu hbuşyo d’Evin dkıtyo idico bi aykanoyutho qşitho dkito ebe. Ramiel Bet Tamraz’ste bu hbuşyano d’Evin’we dkıtyo hbuşyo sxiro la hbişoye dkıtne folitiqore uğer.

U tukoso da Zedqe noşoye Human Rights Watch mawdacle meqım kımo yawme dmatile mawdconutho, d’ğalabe ma hbişoye d’Evin tafilın u virusano. Bet Tamraz hkımwo l’4 yarhe hbuşyo bu şuroyo di şatathe cal dsımwolın slutho bu Fırsoyo li jamacayde bu bayto. İ citatheste sxirowa ba 2009. Bu İran kito adyawma hol 300 alfo Mşihoye d’citotho frişe.