700 farsufe mjarhi ba tagliyotho d’Beyrut

Bıthır ma furqoce dhawın yawme dı tlotho, hüanaqla u camo d’Lebnon nahıt la şuqone leşan dı jobır i şultonuthoı wa rişone du athro, d’torın mi wolithathe dmawbelın u athro lu tehriwo.

 Me athmıl ba şoce dbıthır me falge d’yawmo, ba casro alfayo dcamo nahıt la şuqone u mazcaqle da rişono dmıstacfın mi wolithathe. Be bzabno u camo msıkle hol 4 bınyone da wazırwotho. Ba tagılyothani dıkmdawmi mjarıh ba mowat dıbnaynoşo.

Athmıl ba şoce d’casriye u camo Lebnonoyo kfıxwo la zabuqone d’Beyrut u nahitiwo lu qentrun di mditho leşan dmahwın u hfuxyathe mqabıl da mşale du athro dıkmıthomi bu fasad u bu gnowo da zuze du camo. Bıthır mıd u camo latım, maftele fothe li wazirutho di baroyutho u mahıtle ido acla u mırle; U bınyonano gıdhowe u qentrun du qawmo du camo Lebnono’yo.

U camo dlayımwo dmahwe u hfuxyayde mqabıl da rişone tcınwolın surotho u rşome dkıtwın a surotho du rişono d’Hizballah Hassan Nasrallah u du  rişqutno Mişel Cawın dkıtwo hawlo mcalqo b’qdolaye, dıkrumzi u şnoqo. Be bzabno u camo mazcaqwo mqabıl da rişone u omarwo; A rişone wa mşale kulle klozım dmıstacfın u ahna u camo, gdımdabrina ruhayna, lo kubcina mdabrone dkıtne mlake bu fasad u bu gnowo.

Bıthır şoce u camo mahıtle ido cala bınyone d’3 wazırwotho hrene. Bu zabno da mtagılyone mlewolın a zabuqone, a hayle di mşaynutho dıkmısnodi me Hizballah marıslın buğre cala mtagılyone. Ba jğuşye dhawın mjarıh ba mowat dıbnaynoşo elo bıthır fris tebe, dhın ma qoyume huwlın i isticfathe,.

Wu bıthır i wazirto du tbocofrroso Minal Cabd Alsamad mawdacla dhula i isticfayda xıd protesto mqabıl di şultonutho. Lfuth a mawdconwotho dmıdlan me Lebnon, a gabe Mşihoye hın menaye kdurşi camhode dmıstacfi mi qoyumuthathe du parlamento d’Lebnon. Adyawmaste a mtagılyone mdawmlın bu hfuxyathe u tlıble ma mşale u rişone du athro dmıstacfın ma wolyothathe.

Bu şıkılano u camo kımtalıb ba zedqeyde, u hathe latyo inaqla qamayto da Lebnonoye kımtaybi tagliyotho. Hani yarhe u camo kmahwe hfuxyo mqabıl da mşale elo ucdo u mınyonathe zayıd wa talabe du camo qşeytırne u kmawdıci dgımdawmi hol dhowe şuhlofo bu athro.