A athrawotho caraboye mahwelın hfuxyo mqabıl da hjome dıksaymo Turkiya calu Iraq

A athrawotho caraboye mahwelın hfuxyo mqabıl da hjome dıksaymo Turkiya calu garbyo du Iraq u mahwelın iklaytathe  dıkkurhi ahjomani dıksaymo Turkiya.  Me gabo hreno u athro d’Fransaste mahwele hfuxyo u krıhle ahjome dı Turkiya dkımdawmo calu garbyo du Iraq dkowın celtho lu mawto da mdinoye u tehriwo di fnitho.

Bıthır mıd Turkiya maqşela ahjome dıksaymo calu Iraq tahtu ışmo dıkmıhyo İ PKK  hın athrawotho mahwelın hfuxye  mqabıl d’Turkiya.

Bi sbuthathe u athro d’Fransa krıhle ahjome dıksaymo Turkiya calu garbyo du Iraq, bi maqırhonutho dsımle u waziro di baroyutho d’Fransa Jean Yves Le Drian mırle ahjome dıksaymo Turkiya calu garbyo du Iraq tworo di morutho du athro du Iraqyo mawxa ahna xıd athro kurhina u medano. Mawxa ksaymina qrayto dmitahwe iqoro li morutho du athro du Iraq.

Me gabo hreno u waziro di baroyutho du Iraq sımwole esore cama athrawotho da caraboye laşan dımbayni iklaytathe mqabıl da hjome d’Turkiya.

Bi sbuthathe u rişono du parlemento Caraboyo Mişel Bin Fehim El Sulemi hule maqırhonutho lu tboco froso dıkrıhle ahjome dıksaymo Turkiya cala thume du athro du Iraq.

El Sulemi sımle qrayto l’Emwotho mhayadothoste dmaydi klayto mqabıl d’Turkiya dıkdayşo a zedqe di morutho du athro du Iraq ba hjome dıksaymo calu garbyo du athro.  U rişono du parlemento Caraboyo mırla ahna bi sbuthathe ksındina i şıltonutho wu parlemento du athro du Iraq.

Ba esore dhawiwole u waziro di baroyutho du Iraq Fuat Huseyn cama athrawotho caraboye bi sagiyuthathe mahwelın hfuxyo mqabıl du athro d’Turkiya, u bebzabno mawdaclın dıksındi u athro du İraq. Bayn da athrawotho dmahwelın hfuxyo kito Mısır, Scudiye, Kuvet u ğer athrawotho.