A Bethkrihe d’Darmsuq malın kayiwe di Corona

Mşalo mi şultonutho du rejim d’Suriya, mawdacle da botaykrihe d’Darımsuq laybın fayış dsaymi baytoyutho la kayiwe dtafilın u virus di Corona, cal du kewano mbarbız ğalabe bu athro.

Hathe inaqla qamaytoyo dıkmıctarıf u rejim d’Suriya, dıkloqe kriz qaşyo du hulmono mcal fothe du virus di Corona.

Mu zabno dımşarewole u virus d’Corona dmibarbız b’britho uhul adyawma, u rejim d’Suriya mankarwo dkıtle şwolo du hulmono, yaste dtafi u kewano l’menyono celoyo dıbnaynoşo bu athro. Elo ucdo i naqla qamayto kımawde mşalo du rejim, dlo fayışlın duktho  ba botaykrihe d’Darımsuq leşan dmıstaqbıli a kayiwe di Corona dkıtne sniqoye l’duyoqo du hulmono.

U rejim d’Suriya d’jbırwo ba yawme haroyani dımawdıc du virus di Corona mbarbız ğalabe bu athro, hın ma mşale di wazirutho du hulmono maglelın ucdo calu qento di aykanoyutho harayto du hulmono b’Suriya.

U mdabrono da hedriyat udi aykanoyutho şnızto bi wazirutho du hulmono Tawfiq Hsaba bi maqırhonutho dhule l’Sana, mawdacle dlo fayış carse ba botaykrihe gawonoye d’Darımsuq dmanihi a kawiye mi Corona, u mawxa’ste nqılwo meqım kmo yawme menyono d’kayiwe la botaykrihe da hiğmınwotho hrene du athro.

Bebzabno, Tawfiq Hsaba mawdacle du virus di Corona mbarbız ğalabe ba yawme haroyani b’Suriya. Lfuth u rejim d’Suriya, ba fenyotho dkıtne bi moruthayde belhude 16 alfo u 776 farsufe tafilın u virus hul ucdo, hol alfo dmayithi, elo u kenşo Emwothoyo lıkmawde ba istatistike du rejim u kamwdıc du menyono ğalabe cleytır mawxa’yo.