A camure d’Midın matfelın u yuqdono dnafıq banarcotho di qritho

Athmıl b’lalyo nafıq nuro ban arcotho di qritho d’Ağrite dkıtyo şbobto cami qritho d’Midın b’Turabdin.

 I nurathe matıfyo bu haylo rabo da makinat dı zwiniwo ma mcadronwotho du cameydan, calu darbo da 6 şutose ubi mcadronutho d’Suroyo tv dsımwole tahrazto leşan u snodo di tarmithathe.

Athmıl hedor i şoctho da hsar d’casriye, a Mıdhoye hzelın dı qadiho nuro ba turone dkıtne beyn eleye uli qritho d’Ağrite, dkıtyo 4 kilometre rahıqto me Midın.

Bıthır mıd hzelın i nurathe, a comure di qritho d’Midın cama tıre clayme dkıtlın a makinat du tetfiyo di nuro, malızlın lafi duktho di nuro leşan matfınla, cal dıhşuwlın anarcothathene.

Elo bıthır mıd matın li nuro, mşarelın a comure ba lbuşe tarye wa tıre clayme dkıtwo acmaye a tarte makinat du tetfiyo di nuro, dımatfınla bıthır falge d’şoctho tafyo i nuro dı qadihowa ba arcotho di marca di qritho d’Ağrite.

Bu mamlo dhawilan cama clayme di qritho d’Midın mqadamlın tawdiyotho la şutose, lu camo ulu froshezwo dı qayimi bu zwono da makinatani du tetfiyo di nuro, metul dlowewo ma makinatani lıkmıqdarwo dmitatfiyo i nuro.

A clayme mawdaclın dkull hıdo makina kısaymo i wolitho d’20 farsufe u mawxa bzabno d’falge d’şoctho matfiyo i nuro dmalhaqwola dımawqıdo 10 dönumat da arcotho di marca du sawal.