A comure d’Nuhadra sıme taglitho mqabıl Turkiya

Athmıl casriye a comure di mditho d’Nuhadra bu garbyo du Iraq, mahıtlın klayto mqabıl da hjome dıksaymo Turkiya calu qlimo.

 Ba şoce dcasriye u camo nafıq qum di nuqazto du cboro du thumo, u mahwelın u hfuxyathe u kalın qum da radoyotho u da farsufe dabici d’cıbri me Turkiya lu Iraq.

U hjomo d’Turkiya dıksaymo cala arcotho du Iraq mati lı darğo du ruğzo du camo kmahwe hfuxyo mqabıl d’Turkiya. Athmıl ba şoce dcasriye u camo di mditho d’Nuhadra latım hedor hıdo ma nuqazyotho du cboro du thumo mşarelın dımhawro zacqat mqabıl dı Turkiya u b bzabno maklelın a radoyotho wu camo dkobıc cobır me Turkiya lu Iraq.

Bıthır mıd amtagılyone mahıtlın klayto qşitho dlaw kmaqıbli dıfoyıt noşe me Turkiya i peşmerge du qlimo d’Kurdistan du Iraq mşarele dmıstacmılo haylo u mhoyo mqabıl da mtagılyone, bıthır mıd amtagılyone hulın funoyo nafıq taxtuşe bayn la mtagılyone u la Peşmerge du qlimo.

Lfuth mabuce qlimoye du tboco froso mjarıh mınyono ma mtagılyone ba taxtuşe dımdawamlın zabno cali nuqazto du thumo dkito bayn Turkiya u lu Iraq İbrahim Elxalil. Bi sbuthathe u camo di duktho mati lı darğo du ruğzeyde law kibe tolele elo kmahwele b’tagılyotho dıksoyım.