A farsufe dsımwolın hjomo cal Kılıçdaroğlu tırın hire

Sim u bethdino qadmoyo bi sbutho du hjomo u du rjomo dhawiwo calu rişono di CHP Kemal Kılıçdaroğlu.

 U mqimdino fsıqle, da thimoye kulle dmıtrın hire wu bethdino mcawıq l’siqumo hreno.

Sim u bethdino qadmoyo bi sbutho du rjomo dsımwo calu rişono du gabo di qutnutho du camo CHP Kemal Kılıçdaroğlu wi sictho dacme. Ğalabe farsufe inaqa dabici dmawqıdi u bayto mhaware. U sniğro d’Kılıçdaroğlu Celal Çelik mamtele lu bolo u tewqido du Hotel d’Madımak u dsımwo qtolcamo u tlıbwole i dacwa dmitaslıqo lu bethdino celoyo da jazat yaqure wu talabano dide rfid. Wu zabno du bethdino mwaxır l’1 bu yarho d’Odor.

21 bu yarho d’Nison da 2019 sımwo hjomo cal Kılıçdaroğlu u cali taşdarto du gabo d’CHP dmıştafwolın lu cufoyo dıha folho. Bi dacwa dı ftih bi sbuthathe 36 farsufe kmıtlıb dmitahwelın hbuşyo lhın şato, 10 yarhe u 28 ışne.

Bu yawmo qadmoyo du bethdino a thimoye mqadamme i mudafacathe. Kulle lo maqbale a hawbathe u rdıfe a ithbate wa hezwone dıkmahwın dkıtwın bu hjomo dmascıqiwo dıklozım dmitawqıd u bayto d’Kılıçdaroğlu dkıtwe bgawe.

Bi netije u mqimdino hule fusqono da thimoye kulle dmıtrın hire wi dacwa dımdawmo hınne lo msike.

Calu fusqono u sniğro Celal Çelik mırle, u dino b’tarte fıthothe kımqadım. U hjomano dwewo cala folitiqore di AKP a thimoye kulle gıdmımsıkiwo bu hbuşyo. Wi dacwa gıdmitaslıqowa lu bethdino du jıza yaquro.