A galwoye mahrawlın cito bi Gozarto d’Lisbos bu Yawnan

Agalwoye dıkfixi mu athro dı Turkiya calu Yawnan, mawqadlın u mahrawlın cito bi gozarto d’Lisbos.

Calu hjomano, ha ma hsayo di cito da Rum Ortodoksoye mawdacle d’Erdoğan bu şedorayde amarıhbone kımdawım i siyasayde i bcelıdbobeyto mqabıl du Yawnan.

U rişono du rejim dı Turkiya Erdoğan bıthır mdıftıhle atarce da thumayde qum da galwoye, bı menyono celoyo kfixi calu athro du Yawnan, u grub rabo menaye mahrawlın i cito d’Mor Jırjıs dkıtyo bi gozarto d’Lisbos, twırlın a’surothayda u mawqadlın u madıbho di cito. Agalwoyani dıhçımlın cali cito d’Mor Jırjıs, mhalaqlınste kefe cala puwelıs Yawnoye u mhawarlın “allah u akbar”.

Cali sbuthathe, u rişono di marcitho dı Tanta bı Mısır da Rum Ortodoksoye hasyo Mor Niqola Antonyo bi maqırhonutho dıfrısle bi dafayde, mawdacle du rişono du rejim dı Turkiya Erdoğan bu şedorayde la marıhbone kımdawım i siyasayde i cjıqto mqabıl du Yawnan. Hasyo Antonyo mırle “tre bu yarhano hawiwo şğuşyo rabo bi maşritho da galwoye d’Moria. 500 galwoye dıkfixi m’Turkiya cali maşrithathe maftelın bıthır fothaye lafi mditho d’Lisbos, u tamo hjımlın cali cito d’Mor Jırjıs, twırlın a’surothayda, manhablın aqudşayda u mawqadlın u madıbhayda. Agalwoyani mawqadlın bıthır u cobo u mhalaqlın kefe cala puwelıs Yawnoye laşan dfıthi u tarco du thumo”.

Hasyo Antonyo dmawdacle du nişo da galwoye kaboşe qrihowe ba yawme haroyani, mırleste “arşome dırşimi cala şurone di cito d’Mor Jırjıs, a qudşe dıgniwi, u madıbho dımlakıh, wu zawlo u bulbolo dıfris b’Lisbos, u medanoyo dhawi bi netije da galwoye mşawhıre dımbarbızi bu cılmo mdinoyo mşawşıto d’Urifi i macırboyto”.