A mtagliyone d’Sweda kımdawmi hani arbco yarhe a hfuxyathe mqabıl du rejim

A’mdinotho wa qastrat di fnitho d’Sweda u hedora bu taymno d’Suriya, hazi zabno d’hedor arbıco yarhe, kımdawmi dhowın wahde da tagılyotho du protesto mqabıl di şultonutho dı Darımsuq. A’mtagılyone d’Sweda ktılbi dmitadre u rejim d’Suriya, dmitarfın a’hbişoye saqıbloye, udmitafıt la haye u fusqono d’Emwotho Mhaydotho da 2254.

Ha ma mtagılyone bi maqırhonutho dhule l’North Press, mawdacle di mditho d’Salxad dıknıflo bu taymno d’Sweda, mtayıb eba athmıl taglitho rabtho dmıştawtaflela ba mowat d’farsufe d’athın ma mdinotho u qastrat mşahılfe d’Sweda.

Yawme dı Tre dşaficina ste ba şoce dcasriye, a’mtagılyone du protesto di mditho d’Salxad qadiri dsıxri u qentrun du ferco du gabo du Bacıth dkıtyo bi mditho. Bu zabno dcabiri a’mtagılyone lu qentrun du Bacıth b’Slaxad, nafıq liholo taxtuşe baynaye ubayn da haylawotho du rejim. Ubi netiçe mçarıh menyono ma mtagılyone.

Camgabıdathe, hdo ma dafe gawoye du nawlo di fnitho d’Sweda, mawdacla da mtagılyone di qastra d’Alğariya dkıtyo masırto cami mditho d’Salxad mi xasra di mdabronutho, qadiri bumıhreno dsıxri u qentrun du gabo du Bacıth, u mşahlaflın l’qentrun kenşoyo di mşablonutho.

Athmıl ste, ba casrowat d’mtagılyone layimi bu wahdo du neshono dkıtyo bu mesco di mditho d’Sweda, laşan dım’akdi a’talabaththe dhani arbıco yarhe kobın ağuno laşanaye. A’mtagılyone d’Sweda tcınlın bidothaye athmıl lohiyotho u plankarte dıkthew aclaye “u tamal di hirutho udu neshono raboyo, elo u tamal du dyoşo rabtıryo. i hirutho du renyo zedqo noşoyoyo. Kito man dkobe ağuno laşan di hirutho, ukito ste man dkobe ağuno laşan dmişawşıto u cbodoyutho”.