Pentagon m’akadla dkıtyo hadırto dmıstacmılo haylo mqabıl da hçome dıkmisomi acla

A mathlonwotho, nuqazyotho wu dukotho dkıtla Amerika bu Cıraq ubı Suriya, midi hani 2 yarhe nişo la hçome da ğrobe noqufe du İran-dıkurhi u snodo d’Amerika lu qrobo dıkmaşyo İsroyel mqabıl du zawco d’Hamas dıkmifaşıq xıd tukoso marhıbono mu macırbo.

Bu taro da hçomani dsimi cala dukotho da Amerikoye bu Cıraq ubı Suriya’ste, mçarıh mınyono dfolhe uba maqırhonwotho dsimi me Woşington mawdıc, da hçomani da İranoye, laybın d’jubri Amerika dmıgroşo mu Madınho Mescoyo. U waziro di baroyutho d’Amerika’ste grışle u zuhoro di şultonutho d’Boğdod, dıklozım dımhafdo a mathlonwotho nuxroye dkıtne bu Cıraq.

Calathe ucdo’ste u malolo d’Pentagon-rabhaylawotho Patrick Ryder mırle; U tuhwiyo du funoyano, u zedqo dkıtlan dsaymina u sutoro d’ruhayna’yo. Kımhanena a hayle Cıraqoye dıkmnasın dsaymi u sutoro da dukothaydan. Elo en a haye da folhe u falohaydan dhowın bu qento, lıgmıgroşina dmıstacmılina haylo leşan dım’akdina i mşaynuthathe.

Ryder mırle; U İran kımşaçıc dımdawmi a hçomani, leşan dmote lu nişayde u d’ahna nufqina mu Cıraq ume Suriya. A folhaydan bu Cıraq’ne, cali zminutho di şultonutho d’Boğdod u calathe, ahna’ste gıdmdawmina i wolithaydan wu ağono dkobina mqabıl du tukoso marhıbono d’Dacış.

Pat Ryder mawdacle d’me 17 bu yarho d’Teşrin u qamoyo dşafıcina uholucdo, sim 92 hçome cala Amerikoye bu Cıraq ubı Suriya u mçarıh xayifo hol 66 farsufe u calathe Ryder komır, da hçomani da İranoye lo naçihi ulo matın lu nişathe.