A qıryawotho d’Nuhadra du Iraq kmitanhıbi u kmitahrıwi

A bote da comure d’qıryawotho frişe di hiğmonutho d’Nuhadra du Iraq, manhıbi u mahrıwi.

A more da botani jbiriwo dmahzımi ma qıryawothathe mcal fothe da hçome da hayle kaboşe d’Turkiya calu gerilla di PKK.

6 yarhe bıthır mıd a comure d’qıryawotho frişe d’Nuhadra bu garbyo du Iraq jbiriwo dmahzımi ma taxtuşe dbeyn d’Turkiya udu gerilla di PKK, daciri leşan dhozın i aykanoyutho da botathe. A comurani d’daciri, mlın haşyo bıthır mıd hzelın da botathe manhıbi me kull mede u bıthır mahrıwi.

Ha ma comure di qritho d’Batifa mırle; Hzeli dtwiri a tarce wu mede dkıtwo bıgawe du bayto kule gniw. Lo belhude u baytaydan, elo a bote da comure hrene’ste cayni mede mahrıwi. Qariwo li qritho d’Roisy, markıw 4 nuqazyotho d’Turkiya. 8 kilometre me Roisy, kito i qritho d’Soryana dhzela husrono rabo.

A comure da qıryawothani dlo kubci dtorın ma dukothathe mawdclın, dıkmıjbori li golutho cal dlayto mşaynutho bi fnitho u kull zabno kımşarın a taxtuşani beyn d’Turkiya udu gerilla di PKK dkobe ağono leşan i hirutho du camo Kurdoyo b’Turkiya. Bi qritho d’Soryana kıtwo 15 yaqrotho wu ucdo fayış belhude 5. Hol 1500 bnaynoşo me 22 qıryawotho jbiri li golutho.