A rişone da citotho d’Lebnon laqın bu Vatikan i qadişutho du papa Mor Fransis Qadmoyo

Kmahwe u şroyo arconoyo lımamtele a’firayde, u mawxaste a’rişone da citotho du camaydan u da came hrene Mşihoye d’Lebnon, laqın adyawma bu Vatikan i qadişutho du papa Mor Fransis Qadmoyo.

İ qadişuthayde wa fatıryarxe dmaqımlın adyawma teşmışto laşan u nuhomo d’Lebnon, ramhıl ste kmıntır du papa dıdorış cama rişone da citotho a’hzayotho dkıtlın laşan du şroyo du kriz folitiqoyo u momunoyo qaşyo d’Lebnon.

Bu nişo bu calway “gab Aloho kito tarmitho du şlomo, camıhdode laşan Lebnon”, adyawma mşarelın a’ytawyotho dıqrewole elaye i qadişutho du papa Mor Fransis Qadmoyo dımsalele bu Vatikan cama rişone da citotho d’Lebnon, bnişo dmitarku u şlomo bu athrano udmışre u krizayde.

La ytawyothani kmıştawtıfi a’fatıryarxe da citotho du camaydan d’Lebnon awkith u fatıryarxo di cito Marunoyto u Suryoyto u Malkoyto ba tre mathhabaththe u acmaye ste u fatıryarxo di cito Armınyto wu rişono di cito Protestanoyto.

Camgabıdathe, Mor Afrem II dıgrışle u zuhoro cali casqutho du camo d’Suriya, tlıble ste mi qadişutho du papa dmitaqwe u zawco citonoyo tibeloyo bi sbutho dmihayıd u cedo di Qyamto.

A’ytawyothani dsim u futohaththe adyawma bıhdo slutho kritho, gdımdawmi b’tlotho knuşye sxire lu tboco froso bu Vatikan u gıdmıdroşo ebaye i aykanoyutho ducdo d’Lebnon. U ramhıl ste kmıntır dmıhthomi a’ytawyothani bıhdo slutho tibeloyto dgıdmitaybo bi cito d’Mor Fetrus bu Vatikan.

Lfuth şutose Lebnonoye du tboco froso, u Vatikan lıgıdforıs buyono bu huthomo da ytawyothani, elo balhude u papa gıdsoyım mamlo laşan dmagle cali klayto dkıtle u Vatika mi sbutho d’Lebnon. Wi klaytathe gıdmibayno bıthır mıdşomıc u papa la renye u hzayotho dkıtlın a’fatıryarxe cali ctidutho da Mşihoye udi cito b’Lebnon. Calu asasano u papa gıdorış cama Amerikoye, cam Fransa, cama Rusoye, camu Huyodo d’Urifi ucamu İran, i sbutho dmıfrış Lebnon ma krize qlimoye du madınho mescoyo.