A rişone folitiqoye du Ciraq, mahwelın hfuxye qaşye cala hçome haroye dsımla Turkiya cal fenyotho bu garbiyo du Ciraq

İ rişqutnutho du Ciraq mawdacla da hçome folhoye dıksaymolın Turkiya calu garbiyo du Ciraq dyoşo li morutho du athrone. İ rişonutho bu buyono dıfrısla, mawdacla ste dkımcaqbi b’zuhoro a’hçome dıksaymolın Turkiya calu qlimo d’Kurdistan, udkımmathli tehdid li mşaynutho umthoyto du Ciraq. Bebzabno, u buyono rfıdle kul hçomo dıkmisım m’Turkiya calu garbiyo du Ciraq in dlıhowe  sdirutho mımequm cami şultonutho qentrunoyto d’Boğdod, mawxa ste u buyono mawdacle dıkrofıd dhowe u şroyo da sebwotho di mşaynutho mıhdo xasra, umakadle ste dıklozım dmitahwe iqoro li morutho du Ciraq.

Camgabıdathe, u malolo di wazirutho di baroyutho du Ciraq Ahmad Alsahhaf, mawdacle di şultonuthayde krıfdo u cuqobo haroyo dıksaymole Turkiya calu garbiyo du Ciraq, bi dacwa du nfoqo mqabıl di PKK. Alsahhaf bu buyono dıfrısle mawdacle d’Boğdod b’qaşyutho kıkırho a’hçome dıksaymolın Turkiya ba Helikoptre ub’tayisyotho dlo pilot cala fenyotho d’Matina, Alzab, Avaşin u Basyan bu garbiyo du Ciraq. U buyono dmawdacle da hçomani dyoşone li morutho du Ciraq, makadle ste di şultonutho d’Boğdod lıkmaqıblo dmisım mu athro du Ciraq karidor laşan dmitahwe husrone u zarar la n’athrawotho şbobe, ubebzabno krıfdo dmisım u Ciraq wahdo la qrobe ulu tesfiyo da hşowe laşan manfacat u yuthrone dhın hayle baroye.

M’gabo hreno, u rişono du gabo d’Altayyar Alsadri Muqtada Alsadır mawdacle da hçome Turkoye calu garbiyo du Ciraq dlo celthone, u makadle du Ciraq athro dkıtle morutho kamılto yo. Alsadır bi maqırhonutho dıfrısle bi dafayde du Twiter mzaharle Turkiya u mırle “i şbıbto Turkiya dlo zedqo udlo celtho hçımla cala n’arcotho du Ciraq. U ida dkito acla qento ma n’arcotho du Ciraq klozım dhowela sdirutho cami şultonutho d’Boğdod laşan dmitaqım u qentano mi holo, cal da haylawotho Ciraqoye kibın dsaymi i wolithaththe. U dothe dmikarır u medano m’Turkiya, ahna lıksıktina”.

Mxasra hreto, u rişono du gabo athronoyo di hexamtho Cammar Alhakim, krıhle a’hçome dı Turkiya calu garbiyo du Ciraq, u tlıble mi şultonutho du athrayde dmısko a’thume cam Turkiya. Alhakim sımle ste qroyto l’Turkiya dımyaqro i morutho du Ciraq, udlısaymo cuqobe folhoye b’gawıd da n’arcothayde.