U Symfoni Orkestra du Akademi d’Hatay, mtayable konser bi mdito d’Marburg d’Almanya
U Symfoni Orkestra du Akademi d’Hatay, mtayable konser bi mdito d’Marburg d’Almanya. U momuno dıkcobır ba konserani dıksoyım, gıdmıfroşi la tarmıyotho du bnoyo udu hethotho da dukotho dhzewolın husrono rabo bi zalzale dhawyo’wa b’Antakiya bu yarho d’Şbot da 2023.
MARBUR, Almanya – Lfuth i mawdconutho dmatilan mu hawraydan Abgar Ay, yawme d’Huşabo dşafıcina sımle u Symfoni Orkestra du Akademi d’Hatay (‘Hatay Akademi Senfoni Orkestrası’) konser rabo bi mdito d’Marburg d’Almanya. U konserano mtayıb bu snodo du şutoso di mcadronutho da dıbhe di zalzale d’Antiyoxiya. Bıthır mu gunhano da 2023, mşataswo u şutosano di mcadronutho bnişo dsonıd a dıbhe u dımhafıd i mardutho wa haye mşawtıfe dbeyn da came u tawdiyotho di fnitho.
Ba fulhonani’ste, i gudo di orkestra mtayabla musiqi da came frişe dıkhoyın bi fnitho xıd Armınoye, Turkoye, Caraboye u Yudoye. Camani’ste mtayabla musiqi klassik du Macırbo. U konser dsim bi cito Evangeloyto d’Marburg, mıştawtaflele mınyono celoyo dıbnaynoşo. Mawdıc beyn da hadire, kıtwo’ste u mgabyo d’Marburg dr.Thomas Spies dhawi mcadrono bu tuyobo du konserano.
Bebzabno cal ışme d’ESU’ste, hadır İbrahim Ay, b’ışme d’ZOCD hadır u rişono Ferit Johannes Tekbas u Abgar Ay, mathlono mi izgadutho d’Turkiya u dğer şutose hrene. Osyo Fikret Yüzgülen dkityo u rişono du şutoso di mcadronutho di zalzale Antiyoxia Hatay, mqadamle tawdyotho la mcadrone, la mtaybe ulu froshezwo Suroyo TV d’snıdle u konserano.
U mdabrono di orkestra, Ali Uğur, mqadamle tawdyotho lu snodo da hfitwotho di gudo u mlabable u bnoyo d’Hatay me hatho. İ orkestra bu zabnano kısaymo konsere b’mdinotho mşahılfotho d’Urifi; beynothaye b’Stuttgart wu momuno dıkcobır ba hfitwothani’ste gıdmıfrış lu snodo da tarmıyotho du bnoyo da dukotho dhariwi u shifi bi zalzalathe dhawyo’wa 6 bu yarho d’Şbot da 2023.