Surto: Yazda
24/02/2025

A şlade di 32 Ezidoye mcafin b’zawho ruşmoyo b’Şigor

A şlade da Ezidoye dkıtwın hani eşne b’Boğdod leşan u otopsi, madcıriwo meqım kmo yawme li fnitho d’Şigor bu garbyo du Cıraq wu athmıl sim u zawho ruşmoyo du cufoyathe. Me gabo hreno mqadım rmoyto lu parlamento d’İtalya leşan dmisım quwolo acla bnişo dmitıctarıf bu qtolğenso dsımwole u tukoso marhıbono d’Dacış cala Ezidoye bu yarho d’Ob da 2014.

24/02/2025

CIRAQ/ITALYA – Lfuth u tebo dfrıswo meqım kmo yawme, mawdacwo dkamili a buhone du otopsi dsim b’Boğdod cal 32 şlade dım’akdowa i hiyoyuthathe dkıtwın d’Ezidoye. A 32 şladani mqafanwo b’qabro mkanşo b’Kocho d’Şigor, qtiliwo mu tukoso marhıbono d’Dacış meqım 5 eşne. A şladani bıthır nqili l’Şigor wu athmıl mcafın b’zawho ruşmoyo dsim bi fnitho bi mıştawtıfonutho dba mowat dıbnaynoşo. 

Mawdıc ma 2019 uholucdo, kito b’Boğdod hol 500 şlade d’Ezidoye dımqafanwo b’qabre mkanşe leşan dmi’akdo i hiyoyuthathe bnişo bıthır dmitadcıri lu ahıl ula yaqrothathe. Jğer mani, kito ban alfayo dhrene’ste dhtifiwo yaste dqtiliwo dlo rahme ma marhıbone bu zabno du qtolğenso dsımwole Dacış 3 bu yarho d’Ob da 2014.

Ba mamle dsimi bu zawhano, bkull meltho qşitho krih u qtolğensano dsımwo cali qalılto da Ezidoye wu hdo mani dmaxlasla me ide d’Dacış mırla; Caybo rabo’yo di şultonutho Cıraqoyto sımla iclan şbuqyo gawonoyo-bu zabno d’ahna, kmıstaqbılina a şlade da qariwaydan dımqafın b’qabre mkanşe. İ şultonutho lo nafiqolan moro u calathe klozım dhowina ğalabe mahise, calu qtolğensano heş kımdawım. Kito hol 40 qabre hrene mkanşe dıkmıntır dmıhfori u dmitawfıqi an ahunone u ahwothaydan.

Bebzabno athmıl i qoyumto d’İtalya Laura Bodrini dkıtyo mu gabo Demoqratoyo, mqadamla rmoyto lu parlamento leşan i mawdyonutho bu qtolğenso da Ezidoye. İ qoyumto İtaloyto m’akadle cali sniqutho dkito d’İtalya’ste dmaydo duktha cam ğer athrawotho frişe dmawdelın bu qtolğensano; beynothaye Almanya, Hollanda, Kanada Fransa Beljika, Amerika, Kanada uğer.