A şultonwotho d’Erbil u d’Boğdod matın lawyutho cali fnitho d’Şigor

İ şultonutho qentrunoyto d’Boğdod wi şultonutho du qlimo d’Kurdistan du Iraq, matın l’ittifaq bi sbutho di mdabronutho di fnitho da Ezidoye Şigor.

 Calu ittifaqano dhawi cal Şigorste, hem Amerika u hemste u tukoso d’Emwotho Mhaydotho bu Iraq UNAMİ mawdaclın i fsihuthathe lu fusqonano dmid bi rocyutho du rişwazire du Iraq Mustafa al Kazimi.

Athmıl i şultonutho d’Boğdod wi şultonutho d’Arbil matın lawyutho bi sbutho di mdabronutho di fnitho d’Şigor bu garbyo du Iraq dkıtyo i sagiyoyutho da comurayda Ezidoye. U malolo du rişwazire Iraqoyo Ahmed Mala Talal frısle egartho bu Twitter u makadle, da 2 şultonwotho matın lıqyomo maktabzabnoyo bi sbutho d’Şigor.

U rişwazire Iraqoyo Mustafa al Kazimi dsımle sponsor u ittifaqano, dgımaqwe i mdabronutho federaloyto d’Şigor lfuth a prensibe du nomuso esonoyo du Iraq u bu taro di mşaynutho u di mdabronutho du qlimo. Lfuth u qyomano, i fnitho d’Şigor gıdmidabro mşawtıfo bkul haqlo me Boğdod u Arbil.

İ mıcne du qyomanoste, klozım dmitaqımo i ithutho dkul haylo folhoyo b’Şigor u bu şıkılano, kmıftohi a gade wa mkone du bnoyo u du hethotho di fnitho u dmitadcıri a galwoye la dukothathe bu kordinasyon di şultonutho du qlimo d’Kurdistan. Lu qyomano dhawi, mşale frişe du qlimo mqadamlın a tahınyothathe.

Bebzabno hem Waşington u hemste UNAMİ mawdaclın i fsihuthathe lu ittifaqano dbeyn Boğdod u Arbil cali fnitho d’Şigor. İ rişizgadutho d’Amerika b’Boğdod mırla; Amerika kımqadmo a tahınyothayda la 2 şultonwotho, calu qyomano gıdhowe wesile li mşaynutho aminoyto u li şalyutho da Iraqoye kule du garbyo du athro. İ mşalonitho d’UNAMİ Plasschart’ste mırla; U qyomano dadyawma, dawse ulsoytoyo laf darbo triso dkibe dmamte cam ruhe dactith towo la bnaymothoye du qlimano kule.