Adyawma mabdın a’droşe baroye bayn d’Rusya u Ukraina bi mditho d’Stanbul dkıtne u qamoye dıkmisomi mu rbico di şato da 2022

STANBUL – I taşdarto d’Rusya mrayşınole u mşawrono du rişqutno Vladimer Medenski wi taşdarto d’Ukraina mrayşınole u waziro du sutoro Rusyom Omirov bı mıştawtfonutho d’mşale Amerikoye bi qadmoyuthaththe u waziro di baroyutho Marco Rubio. 

Ba droşani dlıhadırlın u rişqutno d’Rusya Vladimer Putin, kle bu zyudo dkulle cali sbutho dmitabde şalyuthzayno l’zabno d’30 yawme. 

Adyawma safrayto meqım mdımşarın a’bazare baroye bayn d’Rusya u Ukraina, mtayıb lqoyto bayn da taşdaryotho d’Ukraina, dı Turkiya ud’Amerika bu qusro dı Dolma Bahtaşa bi mditho d’Stanbul. I lqoytathe dsimo bi rişonutho du waziro di baroyutho dı Turkiya Hakan Fidan, mıştawtaflela u waziro di baroyutho d’Amerika Rubio, u rişızgado d’Amerika b’Anqara Tom Barak wu mathlono dilonoyo d’Amerika b’Ukraina Kith Kilog. Umi xasra d’Ukraina mıştawtafle u mşalo rabo dkulle di rişqutnutho Andre Yirmak wa tre wazire du sutoro udi baroyutho. 

Rubio bi maqırhonutho dhule adyawma b’Stanbul, sımle qroyto dmitakle u texiro du admo b’Ukraina. Wi malılto di wazirutho di baroyutho d’Amerika Tami Brus mawdacla d’Rubio bi lqoyto dhawile cama tre baramnayde d’Ukraina udı Turkiya, drışle i ulsoyutho dmımte l’huthomo mşayno lu qrobo bayn d’Rusya u Ukraina, u naqla hreto makadle i sniqutho dkito dmitakle u qrobo. 

M’gabo hreno, i wazirutho di baroyutho d’Rusya mawdacla dlatyo rahuqo da bazarani d’Stanbul dmıhthomo b’tahwitho dıkmakılyo u qrobo mqabıl d’Ukraina. Mşalo mi baroyutho d’Rusya bi maqırhonutho dhule lu ajans dı Tas mırle ”kito gado dmiqafe tahrazto laşan du şroyo du kriz dcam Ukraina, elo ulsoyoyo meqım mkul mede dımhalxo Kiyev bu maşıqlo du şlomo b’şıkıl dıkmitaqbılyo”.