Ahaylawotho Iraqoye qtilın menyono marıhbone d’Dacış

Ahaylawotho Iraqoye ba cuqobe dsımlın b’Kerxıslox ub’Salah Aldin, qtilın menyono d’marıhbone u shıflın 11 qentrune di baytoyutho dı Dacış.

 Megabo hreno, u rişwazire du Iraq Mustafa Alkazimi bıthır mu hjomo dsim cal iqartho bı Boğdod, tlıble dmitazidi a’fulhone da nistixbarat, bnişo dmınfıq mqabıl da gunhani dıkfırsi i marıhbonutho bayn da bnaymothoye.

 U grub hmişoyo u ştithoyo da haylawotho di mşaynutho Iraqoye, u bu snodo du haylo oyaroyo sımlın athmıl cuqobo dilonoyo bi qritho d’Mcayzila ubi fnitho d’Bay Hasan bi hiğmonutho d’Kerxıslox. Bi netije du cuqobano ahaylawotho Iraqoye qtilın marıhbono dı Dacış, shıflın 11 qentrune di baytoyutho dı Dacış, mahıtlın ido cal 30 foqucwotho da Hawınat u 90 soruhe dkıtne mu athro d’Austurya.

Camgabıdathe, haylo mu grub da 52 d’Alhaşd Alşacbi ubi sdirutho dcama istixbarat gawoye du Iraq, qadiri bu faho dsımlın bi qastra d’Xormato bi hiğmonutho d’Salahıddin dqıtli u wali du turo dı Dacış dıkmidıc bu ışmo d’Abu Jandal cam tıre ma noturayde.

Mxasra hreto, i şultonutho du Iraq bu zabno dıkfılho laşan dmitarkıwo i şalyutho b’gawıd du athro, agrube mzayne dıkdayşi u qonuno kımdawmi dsaymi gunhe barbroye bhaq da mdinoye, bnişo dfırsi u şğuşyo wi marıhbonutho bayn da bnaynoşo.

Athmıl tre soruhe d’Katyuşşa dımhalqi cal Boğdod, nafili cal bayto d’iqartho mdinoyto bi qastra d’Alradwaniya, ubi netiçe du hçomano u barbroyo shif u bayto kulonoyith u qtil hamşo farsufe, baynothaye tlotho nacime u tarte neşe, ubebzabno mçarıh tre nacime. Bu buyono dıfrıslın a’haylawotho di mşaynutho, mawdaclın da soruhani mhalqi mi şawtho d’Aljihad bı Boğdod.

Bıthır mu hçomano, u rişwazire du Iraq Mustafa Alkazimi mawdacle da folhe dilonoye di mşaynutho mahti bu hbuşyo, cal dmahwelın rafyutho bu haqlo da fulhone di mşaynutho, ubebzabno Alkazimi hule amro dmisım buqore calu hjomano udmicaqbi a’ganohe mayn mathhab aw haylo mzayno dhowın masre acme.

Camgabıdathe, Alkazimi tlıble ma haylawotho di mşaynutho kulle dmazidi bu maşıqlano ducdo a’fulhonaththe bu haqlo da n’istixbarat, bnişo dmınfıq mqabıl da gunhani dıkfırsi i zuctho wu bulbolo bayn da bnaymothoye Iraqoye.