Al Kazimi hule amro dmısxori a makıthbe da grube d’Alhaşd Alşacbi

U rişwazire du Iraq Mustafa Alkazimi, hule amro dmısxori a makıthbe da grube mzayne d’Alhaşd Alşacbi dkıtne bu bethtawso Emwothoyo d’Boğdod.

 Me gabo hreno, u rişono du gabo d’Altayyar Alsadri-Muqtada Alsadır mawdacle dathi u zabno dmimıd hşowo ma grube mzayne, dkıtte mşalutho ba qatle u ba htofe da mdinoye bu Iraq.

 Mabuce di mşaynutho du Iraq mawdaclın adyawma lu tboco froso, du rişwazire Mustafa Alkazimi hule amro dmısxori a makıthbe da grube d’Alhaşd Alşacbi dkıtne bu bethtawso Emwothoyo d’Boğdod, u dmısxori a makıthbe du şutoso athronoyo di mşaynutho u da sicotho d’Alnazaha, du duyoqo udi kinutho dkıtne bgawe du bethtawso.

Lfuth a mabucani, Alkazimi belhude hule fsoso la makıthbe du şutoso dan istixbarat u di wazirutho di gawoyutho dfayşi bu bethtawso d’Boğdod, bu taro du hethotho di aykanoyutho di mşaynutho du bethtawso. U terhiqo da grube d’Alhaşd Alşacbi mu bethtawso d’Boğdod, knofıl bu taro da dawsat dkımhalıq Alkazimi, bnişo dmitanqıs u haylo da grubani ba dukotho ulsoye du athro.

Me gabo hreno, u rişono Şica Muqtada Alsadır sımle qroyto la grube mzayne d’Alhaşd Alşacbi dmaglın cala grube bişe d’ruhaye, leşan dmimıd hşowo menaye mqabıl da gunhe da htofe uda qatle dsımlın cala mdinoye. Alsadır bi maqırhonutho dfrısle bi dafayde du Twiter mırle; A grube d’Alhaşd Alşacbi bıthır mıd mbarelın ruhaye ma grube bişe dıkdayşi a qonune, klozım ucdo dmaglın aclaye leşan baroyo dmimıd hşowo menaye bi methcadronutho da hayle di mşaynutho.

U rişwazire du Iraq Mustafa Alkazimi wa rişone Iraqoye hrene bu zabno dıksaymi şuhlofe leşan dmarkıwi i mşaynutho, i kinutho wi demoqratoyutho bu athro, kımdawmi hulucdo camıhbol bu dyoşo du camaydan u kmacımsi caynothaye cala zedqayde. İ Mtakasto d’Şlomo bu buyono dfrısla, grışla u zuhoro calu dyoşo dıkmisım b’idactho ubı haqle mşahılfe calu camaydan bu Iraq. Bu buyonayda i Mtakasto d’Şlomo mırla; Bi şabtho dşaficina a 3 rişonwotho du athro mıstaqbewolın grube d’neşe Ezidoye, Şabakoye u Turkumanoye dmaxılsiwo me Dacış. Ahna bu zabno dıkmaydina i dawsathe, kım’akdinaste dıklozım dmiqadım b’kinutho la debhe du qtolğenso dsımle Dacış, u kımşaylina qay a rişone Iraqoye lo mşadarlın zminutho la bnotho du camaydan leşan dhowın bgawe di taşdartathe d’yatiwi acmaye.