Al Monitor frısle tebo calu futoho d’Suroyo FM

I dafo d’al Monitor, frısla tebo calu futoho du frosqolo du camaydan Suroyo FM bi mditho di Qamışli bi Gozarto d’Bethnahrin.

 Al Monitor dmahkele du frosqolano mşarewole ruşmoyith dforıs tebe u tahrazyotho frişe bu leşono Suryoyo, Armınoyo u Kurdoyo, sımleste maqıblonwotho cama mşale du frosqolo.

I dafo d’al Monitor dkıtyo u qentrunayda b’Woşington d’Amerika, kıfurso tebe u nuhole cala şuşote dkowın bı athrawotho frişe du Madınho Mescoyo. Ucdoste i dafo frışla duktho lu frosqolo qamoyo du camaydan Suryoyo FM, diftih bi mditho di Qamışli bi Gozarto d’Bethnahrin.

Bu şuroyo du tebano mawdıc; Ftih frosqolo hatho b’Qamışli dkıtyo qariwo la thume beyn d’Turkiya u Suriya wu frosqolano, kmıfrıs bu leşono catiqo da Mşihoye u Suryoyo. Suroyo FM mşarele 2 bu yarho d’Şbot dforıs bu leşono Suryoyo u Caraboyo, bıthır me çerobo d’3 yarhe. Bebzabno kmıntır du frosqolano dforısste bıthır bıgawe di şatathe bu leşono Armınoyo u Kurdoyo.

Al Monitor mahkele du frosqolo gıdforıs tebe frişe u gıdmtayıb tahrazyotho kenşoye u marduthoye du qlimano dıkhoye ebe Suryoye-Othuroye, Kurdoye, Caraboye u Armınoye. İ dafo sımlaste maqıblonutho camu rişono zawgoyo d’Suroyo FM Samer Hanna ubu mamlayde mırle; Gıdhowelan tahrazyotho frişe folitiqoye, kenşoye u marduthoye u gıdkolina calu makthabzabno du camaydan. Bebzabno, gıdhowelan tahrazyotho dilonoye calu hulmono ucala neşe uğer.

I rişonitho zawgoyto Maria Hannaste mırla; Kıfursina ucdo 12 şoce u yawmo bu qlimo du garbay madınho d’Suriya beynothaye Qamışli, Camuda, Darbasiye, Tel Temır, Hasake, Qahtaniya, Derik uğer. Kıtlanste matibone bı dukotho frişe dıknuqlilan tebe, hatta mu gbino du qrobo xıd Tel Temır u Cayn Cisa.

Samer Hanna makadleste du frosqolo d’Suroyo FM masroyo bu froshezwo d’Suroyo TV dıkforıs hani 15 eşne tahrazyotho frişe me Södertelje du Swed. Bu tebano, mahkeste cala falohe hrene du frosqolo, i methcadronutho dkıtle cam Arta FM u cala dafe, a froshezwe u ajanse hrene dkito ba dukotho di Mdabronutho yothoyto du garbyo udu madınho d’Suriya.