Rişathqutno qameyto athto bu Yawnan

I rişathqutno qamayto du Yawnan, yimela li wolithayda i hathto bu zawho dsim bi arişkoyto d’Athena.

 Bu şıkılano, mıdle u Yawnanste dukthe beyn dan athrawotho dıbritho, dkıtte neşe rişathqutno.

Katerina Sakellaropoulou dkıtyo cımra 63 eşne u dayonto, hawyo i athto qamayto bu Yawnan dımnaqyo rişathqutno du athro. Bu zawho dsim athmıl b’Athena, yimela Sakellaropoulou li wolithayda i hathto xıd rişathqutno du Yawnan.

Bu normal gıdhodarwo hol alfo bnaynoşo lu zawhano, elo mcalfothe du qento du virus d’Corona, mıştawtafle belhude 150 farsufe ulo hiw aftho, d’noşo dmosık ide dhıdode. Kito 117 farsufe bu Yawnan dtafilın u kewano.

İwolitho du rişqutno bu Yawnan, belhude remzonoytoyo u kısoyım i wolithathe l’zabno d’5 eşne. U rişqutno du Yawnanste, kminaqe mu parlamento du athro. Bu quwolo dsımwo bu parlamento-ma 300 qoyume dkito mıdla Sakellaropoulou u snodo d’261 menaye.

Ban alfayo d’galwoye kımnasın dmotın lu Yawnan me Turkiya bıthır mıd u rişqutno Turkoyo ftıhle a tarce du athro u Sakellaropoulou huwla şudoyo, dgımaydo i sbuthathe li ido u mırla; Gıdmadcırina funoyo qaşyo lani, dıkmnasın dımathri cali morutho du athraydan bu isticmal du haşo dıkhoyın a galwoye. Elo i mşaluthaydan i noşoyto’yo, dımdafcina a farsufe dlıkqudri dımdafci ruhaye.