Alkazimi hule amro dmitaltım u zayno dkıtyo bidothıd da grube marhıbone

U rişwazire du Iraq Mustafa Alkazimi, hule amro lu gayso dmahıt ido calu zayno dkıtyo falito awkith u zayno dkıtyo bidothıd da grube Maşılmone Şica udlatla i şultonutho duyoqo acle. Be bzabno, Alkazimi mawdacle du şutoso folhoyo du Iraq klozım dımdafıc u camo wu sistem demoqratoyo du athro.

U rişwazire du Iraq Mustafa Alkazimi mşarele i wolithayde i hathto, b’şişaltho d’fusqone jıddi dıkmahti klayto qrıhto mqabıl du haylo dkıtle u İran b’gawıd du athro du Iraq.

Alkazimi bi ytawto dhawile camu waziro du sutoro Jumca Aljabburi ucama rişone hrene du gayso, hule amro dmitahıt ido calu zayno falito dlatla i şultonutho du Iraq duyoqo acle, udmınfıq mqabıl di marıhbonutho udu tukoso dı Dacış.

Be bzabno, Alkazimi makadle du şutoso folhoyo klozım dımdawım i wolithayde bu sutoro di morutho du Iraq udi şalyuthayde, uklozımste dımdafıc u camo udsoyım u sutorayde wu sutoro du sistem demoqratoyo du athro.

Agrube mzayne da Maşılmone Şica du Iraq d’Alhaşd Alşacbi dıkmısnodi mu İran krıfdi hul ucdo dımhalqi u zaynaththe, ubu şıkılano hawın u haylo folhoyo rabo dkımathır cala fusqone siyasi du Iraq.

Me gabo hreno, u rişono tawdithoyo Lebnonoyo dkıtyo qariwo mu gabo d’Hizballa Cali Korani, sımle hjomo qaşyo calu rişwazire du Iraq Mustafa Alkazimi, u thımle dıkmafıt la haye i agenda d’Amerika bu Iraq.

Korani bu vidyo dıfrısle bi dafayde du facebook, mawdacle d’Amerika rdithoyo m’Alkazimi cal dgıdmafıt la haye u nişo dkıtla du lhoyo da grube mzayne d’Alhaşd Alşacbi, uda grube hrene mzayne dkıtne noqufe du İran.

İ maqırhonuthathe d’Cali Korabi xlıqla zmomo bu Iraq u mahwe mqabıl dide hfuxyo qaşyo mhın qoyume, folitiqoye, gelyunore u nahire umu kenşo mdinoyo du Iraq.