Almanya Fransa u İtalya mzahare a hayle dıkdeyşi u ambargo da zayne cal l’Libya

Fransa, Almanya u İtalya mahwelın hfuxyo mqabıl da hayle dıkdayşi u qyomo d’Emwotho Mhaydotho. A 3 athrawotho mzaharlın, dıgmıstacmıli tedbire mqabıl dan athrawotho dıkdayşi u ambargano da zayne l’Libya.

 Bebzabno u mşalo da esore baroye du Huyodo d’Urifi Josep Borrell makadle, du Huyodo d’Urifi latyo fsihoyo la nuqazyotho dıkmarkıwo Turkiya u Rusya b’Libya. Camathe Mısırste thımla Turkiya dkımdaxlo ba sebwotho gawoye dan athrawotho Caraboye.

U rişqutno d’Fransa Emmanuel Macron, i rişathwazire d’Almanya Angela Merkel wu rişwazire d’İtalya Giuseppe Conte, tlıblın a hayle nuxroye kulle dkıtne b’Libya dımyaqri u ambargo da zayne dmahıtwole u Mawtbo di Mşaynutho d’Emwotho Mhaydotho cal Libya.

Bi maqırhonutho mşawtafto dfriso me Bruksel, a 3 athrawotho hawıl naqla bşıkıl qriho mzaharlın, dıgmıstacmıli tedbire mqabıl da hayle dıkdayşi u ambargano da zayne l’Libya. A 3 rişone mırlın; Hadirena dmıstacmlina tedbire mqabıl dani dıkdayşi u ambargo du nqolo da zayne bu darbo du yamo, di naşfe udi hawa.

Turkiya maqşela a cuqobayda b’Libya u kımcadro a marhıbone ba cuqobe dıksaymo mi hawa leşan u snodo di şultonutho d’Fayez al Sarraj mqabıl du rabhaylawotho Xalifa Haftar dıkmısnıd me Rusya, a İmarat Caraboye Mhayde u Mısır. Anathrawothaniste kmıthomi dıkdayşi u ambargano d’Emwotho Mhaydotho.

Cali aykanoyuthathe d’Libyaste, u mşalo da esore baroye du Huyodo d’Urifi Josep Borrell mawdacle ilo thnihuthayde cala nuqazyotho dmarkawla Turkiya u Rusya b’Libya u mawdacle, dlayt yuthrono lu terkiwo da qentrunani ban arcotho d’Libya-qariwo la thume d’İtalya. Camatheste Mısır mkararla u hfuxyayde mqabıl d’Turkiya wi mudaxala dıksaymi la sebwotho gawoyo dan athrawotho Caraboye.

U waziro di baroyutho d’Mısır, bı qaşyutho hjımle cal Turkiya wi mudaxalathe dıksaymo bu haqlo folhoyo u folitiqoyo la sebwotho gawoye dan athrawotho Caraboye. Wi mudaxalatheste latla snodo qonunoyo wu dyoşo da qyome uda qonune du Mawtbo di Mşaynutho d’Emwotho Mhaydotho’yo. U waziro mırle; Tıı athro, latle zedqo dımdaxıl ba sebwotho gawoye du athraydan.