Almanya mdela qyomo camu qlimo d’Kurdistan laşan u teqwiyo u lu şuşoto di peşmerge

Almanya mdela qyomo cami wazirutho di peşmerge du qlimo d’Kurdistan du Iraq, leşan u tuyobo d’tarmıyotho hathe lu teqwiyo ulu şuşoto da hayle di peşmerge.

Uqyomano dcala tarmıyotho leşan i peşmerge, mıde athmıl beyn d’mşalo du gayso d’Almanya udu waziro di peşmerge du qlimo d’Kurdistan.

İ wazirutho di peşmerge du qlimo d’Kurdistan u mşalo du gayso d’Almanya, mıttafqi athmıl cal qyomo leşan dmitayıb şişaltho d’tarmıyotho hathe bnişo dmisım hethotho wu şuşoto ba hayle di peşmerge bu taro du snodo uda reforme dkubco  Almanya dsaymo bi peşmerge.

U qyomano mde athmıl b’zawho ruşmoyo beyn du waziro Kurdoyo Şorş İsmayil udu mşalo Almanoyo Holger Kunkel bi izgadutho d’Almanya dkıtyo b’Arbil. Lu zawhanoste hadır u mcadrono du izgado Almanoyo b’Arbil. U mşalo Almanoyo makadle, da tarmıyothani gıdmcadri i wazirutho di peşmerge bu planayda da reforme folhoye.

U waziro İsmayilste mhanele u inisyativano udi methcadronutho dkito beynothaye udu gayso Almanoyo wu mıqa a fulhone mşawtıfe, hawın mawthrone bu ağono mqabıl di marhıbonutho ubu terkiwo di mşaynutho udi şalyutho bu qlimo.

İsmayil dmawdacle i thnihuthayde lu fusqono dmıdle u parlamento d’Almanya leşan dmitawrıx u zabno di ithutho da folhathe udu droşo da hayle Kurdoye bu qlimo d’Kurdistan mırle’ste; Cal ışme di şultonutho d’Arbil uda hayle di peşmerge, kımqadamno a tawdiyothayde li şultonutho d’Almanya u lu gaysayda.