Alsudani hule amro dmiqadım kul şıkıl dıfşitutho li taşdarto du Nato dkıtyo bu Ciraq, bnişo dmakışro i wolithayda di mşawronutho

BOğDOD – U rişwazire du Ciraq Muhammad Şiyac Alsudani, mıstaqbele athmıl bi mditho d’Boğdod u rişono hatho di taşdarto du Nato bu Ciraq General Kristof Hintzy bi mıştawtfonutho du rişono catiqo di taşdarto du Nato general Lukas Şxoyres. 

Alsudani dımhanele Hintzy mawhele ste u iqorayde la fulhone dsımwole Şxoyres bu zabno di mdabronuthayde lu Nato bu Ciraq. Alsudani makadle ste du athrayde b’fusqono kamiloyo dımdawım an’esore towe dkıtle camu Nato, bu darbo du mede dımşararwo bu knuşyo du diyalog dımtayabwo b’darğo celoyo bi mditho d’Bruksel bi şato dşaficina, ubu taro da hıdriyat dıkmisomi lu knuşyo trayono dgıdmitayıb bı Boğdod cal qariwo. 

Bebzabno, Alsudani hule amro dmiqadım kul şıkıl dıfşitutho li taşdarto du Nato dkıtyo bu Ciraq, bnişo dmakışro i wolithayda di mşawronutho, udmisım şawtofutho hfito u sdirutho mşawtafto bayn da tre gabe. 

M’gabo hreno, rabhaylawotho Lukas Şxoyres mhanele Alsudani cal du Ciraq makşarle bu tuyobo du knuşyo da rişone Caraboye da na’34, ucala fulhone dıkmisomi bu haqlo di camara udu benyono tahtoyo udu quyomo momunoyo dıksonıd i şalyutho bu qlimo.    

Bebzabno, Şxoyres mqadamle tawdiyotho lu dewam du snodo dıkmahwele u Ciraq li taşdarto du Nato, u makadle ste di taşdarto gdımdawmo dhowela sdirutho u methcadronutho cama şutose folhoye udi mşaynutho du Ciraq, bnişo dmiqadım elaye yulfono u mşawronutho udmişawşıt u fulhonaththe. 

Mxasra hreto, i wazirutho du sutoro du Ciraq mawdacla athmıl du Ciraq şqile holikoptre du tektik u sisteme d’soruhe u radare mu athro dı Fransa ud’Qore i Tyamnoyto, bnişo dmitaqwın a’mkone du sutoro oyaroyo du Ciraq.