10/05/2021

Altayyar Alsadri fsıqle dmawrıx afulhone du tedciro da mulkone kbişe da Mşihoye uda Sabiaa Mandoye du Iraq

U gabo d’Altayyar Alsadri fsıqle dmawrıx a’fulhone di sictho dilonoyto du tedciro da mulkone kbişe da Mşihoye uda Sabiaa Mandoye du Iraq.

A’fulhone di sicthathe dıkmisomi bı Boğdod, Albasra, Kerxıslox u Mawsal, mawrıxi hul bıthır mu cedo da Alğadir dkımcaydile a’Maşılmone Şica du Iraq.

U rişono du gabo d’Altayyar Alsadri Muqtada Alsadır, fsıqle dmitawrıxi a’fulhone di sictho dilonoyto du tedciro da mulkone kbişe da Mşihoye uda Sabiaa Mandoye du Iraq, hulu bıthır mu cedo d’Alğadir dkımcaydile a’Maşılmone Şica bu siqumo d’18 bu yarho d’Konun u Qadmoyo dıbqamuthayna.

Bebzabno, u makıthbo dilonoyo d’Alsadır dkıtyo bi hiğmonutho d’Alnajaf, frısle maqırhonutho ruşmoyto dkiba u fırşağno du post adress du nawlo camu raqmo du talafon, laşan dmişadri a’şkuwat wa talabe da bnaymothoye dıkbişi a’botathe.

Bu zyudo da bote kbişe bı Boğdod ne, cal dıkhoyewo eba menyono celoyo mu camaydan, ubıthır mena kothın a’mdinotho d’Albasra, Kerxıslox u Mawsal. Hul ucdo 10 bote du camaydan bi mditho d’Albasra madıcri la moraththe, u kitoste şkuwwe bhaq d’bayto dgıdmişroyo i sbuthayde mi sictho dilonoyto.

Hın ma more da bote du camaydan kıtlın zuctho dımqadmi şkuwwe bhaq du kboşo da botaththe, ukito ste hın mu camaydan dıjbiri dımzabni a’botaththe b’timone nohute, elo i sictho d’Alsadır lıkdırşo hawxa sebwotho cal dkımdacyo dhawi şıkıl d’awyutho bayn du mzabnono udu şaqolo du bayto.

Bakmo yarhe dşaficina, u rişono du gabo d’Altayyar Alsadri Muqtada Alsadır mawdacwole dımşatasle sictho dilonoyto laşan dhayro ba şkuwwat da Mşihoye dıkbişi a’bote u mulkonaththe mhın grube d’ganohe dıkmısnodi m’hayle folitiqoye u zaynoye.