Amawte mi cıltho di Corona kımdawmi bu athro du Swed

U kewo du virus d’Corona kımdawım dıdoyıq a’tarce du camaydan dıkhoyen bu athro du Swed.  Nabiha Malke dkıtyo i emo dıhdo ma hwaryothaydan d’Suroyo TV, athmıl nqilo ma hayani bcımro d’81 ışne, mi celtho du kewo d’Corona.

Stockholm dkıtyo i nuqazto du virus d’Corona bu Swed, kımdawmo dımvayco menyono celoyo d’farsufe, baynothaye mu camaydan.

Nabiha Malke dkıtyo athto mu camaydan u Suryoyo dıkhoye bi mditho d’Södertelje, meqım tarte şabe tafiwola u virus d’Corona, elo i bethkrihe di mditho ba n’esore dhawiwola cami iqartho, mawdacwola dlıklozım i mhasayto dıthyo li bethkrihe ubalhude dfayşo bu bayto.

Callathe, u kewo bıthır mıdqaşi cali mnohto Nabiha, nqilo bu ambulans yawme d’şabtho dşaficina li bethkrihe d’Södertalje, u mahto bi qelayto du duyoqo qaşyo du hulmono. Elo i mhasayto Nabiha cılmıd du ağuno dhula mqabıl du kewo, athmıl ba şoce d’falgıdyawmo nqilo ma hayani bcımrıd 81 ışne.

İ mnıhto Nabiha Malke dmawlıdo i şato da na’1939, i emo di hwarthaydan Mariroz Cabdılke’yo dhani ışne yarixe kfılho bu froshezwo d’Suroyo TV.

Nabiha dımhayadwola a’hayayda cam Fuad Cabdılke, mgalwewola cami iqarthayda mi mditho di Hasake b’Suriya lu athro du Swed ba tmoniyat du doro dşaficina. İ mhasayto Nabiha Malke kıtla arbac bnotho u tlotho clayme.

Camu husoyo d’Nabiha Malke, u menyono du camaydan dınqili ma hayani bu Swed mu kewo d’Corona, mati l’15 farsufe.