23/05/2021

Amerika gıdobo 120 milyone dolare lu gayso d’Lebnon

Me gabo hreno, i wazirutho di baroyutho d’Amerika mawdacla, dgıdobo 120 milyone dolare lu gayso d’Lebnon. Bu şıkılano, mazıdla Amerika i mcadronutho şatonoyto dkobo lu gayso Lebnono’yo 12 ba mo.

İ celtho rişoyto dmazıd u snodano d’Amerika lu gayso d’Lebnon, u kriz momunoyo dkito heş bu athro u dıkm’athır bşıkıl mrimono calu gaysayde’yo.

Bu knuşyo dsim bu darbo du video camu mşalo Amerikoyo dcalu duyoqo da zayne udi mşaynutho Emwothoyto Eliot Kang udu rabhaylawotho du gayso d’Lebnon Joseph Aoun uğer mşale Amerikoye u Lebnonoye, mawdacle Eliot Kang, d’Amerika gıdmqadmo mcadronutho zuzonoyto lu gayso Lebnonoyo.

Bıthır mi ytawtathe, i rişizgadutho d’Amerika b’Beyrut m’akadla d’Amerika gıdobo 120 milyone dolare lu gayso Lebnonoyo cal dkıtyo Woşington masırto bu şudoyayda du snodo d’Lebnon. Bu şıkılano, mazıdla Amerika i mcadronutho şatonoyto dkobo lu gayso Lebnon 12 ba mo mi celtho du kriz momunoyo du athro.

İ mcadronuthathe dgımşadro Amerika frişo lu teqwiyo du ağono mqabıl di marhıbonutho, lu duyoqo da thume du athro ulu bınyono tahtoyo du gayso d’Lebnon. Amerika gıdmqadmo u snodano, bıthır mıd u rabhaylawotho Joseph Aoun m’akadle i sniqutho rabtho dkıtle adyawma u gayso dkull dkothe kıdhocıf mqabıl d’Hizballah.

Bi egartho dımşadrowa li Sictho da esore baroye du Senato d’Amerika mawdacwo du gayso d’Lebnon, laybe fayış dmawkıl a folhayde basro cal dkıtyo ğalabe timo. Bebzabno mu krizano du momuno kito’ste qento, da folhe dtorın mu gayso ubi netiçe dkibe dothe dhowe qrobo hreno gawoyo b’Lebnon. Hizballah uğer ğrobe folhoye gzımlın İsroyel wa thume du qlimo. Mi şato da 2006 uholucdo, matile u gayso d’Lebnon hol 2 milyare dolare me Amerika.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…