Amerika gıdobo 25.6 mılyune dolare lu athro du Iraq laşan u kewo di Corona

Amerika mwacadla, dgıdobo 25. 6 milyone dolare lu Iraq. İ mcadronuthathe gıdmitahwıyo, bu taro du snodo dkobo Waşington la fulhone mqabıl du pandemi d’Corona.

 İ wazirutho di baroyutho d’Amerika mawdacla du snodano dgımitahwe lu Iraq, kımşakıl u snodo rabo dgıdobo holucdo l’athro, dkobe ağuno mqabıl du virusano d’Coronayo.

 Amerika mbayanla 508 milyone dolare xıd mcadronutho la tukose Emwothoye ula şultonwotho dı athrawotho frişe dıbritho, bnişo dı qudri dmafiti u virus d’Corona lu duyoqathe. Bi maqırhonutho dhuwla i wazirutho di baroyutho d’Amerika mawdacla, d’fsıqla dımqadmo 25.6 milyone dolare lu Iraq, leşan dı qodır dobe funoyo mqabıl du virusano.

 Bu şıkılano, hawi u Iraq u athro rişoyo dıgmotele buzyodo mi mcadronuthathe dımbayanla Waşington leşan u ağono mqabıl di Corona. İ wazirutho di baroyutho mırla; A zuzani, gıdsundi a fulhone msarhıbe leşan u kontroll du virusano dılo mibarbız, dmisım tarmıyotho dunqolo di mawdconutho lu camo, dmibayın fulhone di nadafe, du hulmono, da maye nadife du ştoyo uğer.

 Waşington mawdacla, d’19.1 milyone mbayni xıd mcadronutho la fulhone du hulmono u mqabıl du gunho, bnişo dmitayıb labratowar, dmisım u duyoqo du hulmono da bnaynoşo dıkfayti ba thume, u dmıkle qum du virusano uda şawbat hrene dlo mibarbızi zıttır. Mbayın’ste 6.5 milyone la galwoye ula qalilotho ula dukotho dıkcayşi ebeye.

 Bı zabno d’20 eşne, mqadamla Amerika hol 70 milyare dolar mcadronutho lu Iraq; beynothaye 4 milyare lu haqlo du hulmono. İ rişizgadutho d’Amerika b’Boğdod mırla; Amerika bı fusqono kamiloyo dımcadro u Iraq mqabıl du pandemiano d’Corona. İ wazirutho du hulmono du Iraq m’akadla, dhol 856 mvayaclın a hayathe mu virusano bu athro. Mawdıc d’Amerika mqadamlaste 18 milyone dolare la fulhone mqabıl du virusano b’Suriya.