Amerika gımzabno zayne li Scudiye u l’Kuwet

Amerika maqbela dımzabno zayne la nathrawotho di Scudiye wu Kuwet b’timo dıkmote l’hedor 295 milyare dolare.

 Baynothaye i Scudiye gıdşıqlo 3 alfo foqucwotho wu athro du Kuwet gıdşoqıl tayısyotho Abatşi u falqe du sistem da soruhe d’Patiryot.

 U Pentagon mawdacle di wazirutho di baroyutho d’Amerika maqbela dımzabno li Scudiye 3 alfo foqucwotho dıkmohın b’diqqa rabtho u nişathe cam alat u falqe du lojistik u timo da foqucwothani kmote l’290 milyare dolare.

U zebono du zaynano athi luhwoyo ba yawme haroye dfayışle u rişono d’Amerika Donald Trump bi şultonutho. Elo u rişono hatho dqamır ba guboye Jeo Biden huwole şudoyo dmakle u zebono du zayno lu athro di Scudiye dkıtyo u athro şaqolo rabo dkulle da zayne Amerikoye bu madınho mescoyo, bnişo dmisım hboso cali şultonutho d’Alriyad u dmatimo u qrobayda camu Yeman.

Bebzabno, u Pentagon bu buyono hreno frişo mawdacle di wazirutho di baroyutho maqbela dımzabno tayisyotho d’Holikopter Abatşi u falqe du sistem da soruhe d’Patiryot lu Kuwet b’timo dıkmote larbıco milyare u 200 malyune dolare.

Camgabıdathe, u şutoso di methcadronutho di mşaynutho du Pentagon, athmıl hule xabro li kongre cala tre qyomani du zebono du zayno li Scudiye ulu Kuwet.

Lfuth Reuters, i wazirutho di baroyutho d’Amerika walaw ste dmaqbela dımzabno zayno li Scudiye ulu Kuwet, elo u medano latyo i mıcnayde da trate qyomani mdın ruşmoyith.