Amerika grışla u zuhoro cal Unifil bi sbutho d’Hizballah

İ wazirutho di baroyutho d’Amerika huwla maqırhonutho cali klayto dkıtla mqabıl da haylawotho di mşaynutho d’Emwotho Mhaydotho dkıtne b’Lebnon-UNİFİL.

İ wazirutho mırla; A haylani lıkqudri dmamtın i wolithathe li duktho dmaklın a zayne dıkfayti lu tukoso d’Hizballah, u mawxa klozım dmitaklın u dmitahwe  snodo lu gayso d’Lebnon dmakle u Hizballah.

 Bi mawdconutho dhuwla i wazirutho di baroyutho d’Amerika bhaq du haylo dkıtla Emwotho Mhaydotho b’Lebnon dıksaymi u duyoqo di mşaynutho du athro mırla; U haylano u folhoyo tawtıryo dmitakle, metul dlaybe dmakle u tukoso d’Hizballah. Mawxa klozım dmıgrış u dmitaqwe u gayso ruşmoyo du athro.

Bi maqırhonuthayda i wazirutho mırla; UNİFİL lo qadır dsoyım u mede dıkmıtlabwo mene u lo qadır dmaklın a zayne dıkfayti lidothe d’Hizballah u calathe tawtıryo dmitaklın a haylani u bıdukthaye dmitahwe snodo folhoyo u momuno lu gayso d’Lebnon. İnaqlayo kibe dmıkle qum du haylo Şica, du nişayde dımfarfıs u athro kuleyo.

I wazirutho di baroyutho d’Amerika mırlaste; Emwotho Mhaydotho layba dımsafyo u qetro d’Lebnon, elo dsundina u gayso wi şultonutho ruşmoyto du athro, kiban dkolina mqabıl da hayle mzayne dlatne ruşmoye, beynothaye u haylo folhoyo d’Hizballah.