Amerika kısundo u dialog beyn da gabe kurdoye d’Suriya

‘Amerika kısundo u dialog dmabde beyn da gabe folitiqoye frişe du garbay madınho d’Suriya ba melani, du mşawrono du mathlono dilonoyo d’Amerika b’Suriyane.

 Bu mamlo d’sımle u mşawrono Richard Outsen bı hfitutho dsımle u waqıf d’SETA dkıtyo masro bi şultonutho d’Turkiya makadleste, d’Amerika kubco dmitabde droşe beyn Ankara uda Kurdoye.

U mşawrono du mathlono dilonoyo d’Amerika b’Suriya, James Jeffrey, Richard Outsen mıştawtafle l’droşo dsim bu nawlo mu waqıf Turkoyo d’SETA dkıtyo b’Woşington. Bu mamlo dsımle Outsen makadle, d’Amerika kısundo u dialog gawoyo dmabde ba zabne haroyani beyn da gabe Kurdoye du garbay madınho d’Suriya.

U mşawrono mırle; Amerika kısundo u şıkıl da droşani leşan u şeçoco du terkiwo d’gabe folitiqoye frişe u dmıxlıq maşıqlo u haye folitiqoye kyonoye bu garbay madınho d’Suriya. Kito sniqutho rabtho dhowe hawxa droşe beyn da ğrobe u gabe folitiqoye du garbay madınho d’Suriya. Bi hzaytaydan’ste, klozım dhowe droşe beyn di saqıbloyutho d’Turkiya uda Kurdoye d’Suriya.

U gabo du Huyodo Demoqratoyo wu Mawtbo Athronoyo Kurdoyo dkıtne a 2 gabe Kurdoye rabe du qlimo, mabdewolın bu yarho d’Teşrin u haroyo droşe camhıdode leşan u huyodo dbeynothaye-bıthır mıd Turkiya mabdewola a hçomayda calu garbyo d’Suriya.

U mşawrono Amerikoyo mırle’ste; Latyo u şwolo dhowe mathlonutho baroyto u loste dhowe la droşe d’Geneve beyn di saqıbloyutho d’Suriya udu rejim du athro. Klozım dmidıc u şıkıl di mdabronutho u aydarbo’ne a haye bu garbay madınho d’Suriya u mın hirutho folitiqoyto kito bu qlimo.

U mathlono James Jeffrey’ste mawdacwole bi harayto du yarho dı şafıcina, d’Amerika belhude kıtla ha prensib bi sbutho da ğrobe saqıbloye d’Suriya; acmaye’ste a hayle d’QSD wa mdabronwotho qlimoye du garbyo d’Suriya-u snodo du qyomo d’2254 d’Emwotho Mhaydotho leşan u şekolo du nomuso esonoyo hatho d’Suriya.