Amerika krıhla i itawto d’Turkiya cam Hammas

Me gabo hreno i malılto di wazirutho di baroyutho d’Amerika Morgan Ortegas bu mamlo dsımla mırla en Erdoğan dımdawım ba itawyotho dkıtle cam marıhbone d’Hammas inaqayo gıdfoyış hiye lruhe bu madınho mıscoyo.

Amerika bu zabno haroyo ksaymo maqırhonwotho mşahılfe mqabıl di siyase dıkmaşe Erdoğan cama athrawotho du madınho mıscoyo.

Ba yawmotho dı şaficina u rişqutno d’Turkiya Erdoğan hawiwole itawto camu mşalo du biro siyasi d’Hamas İsmail Heniye wi taşdarto dkıtwa acme.

İ itawtathe grışwola u zuhoro d’Amerika mawxaste bi maqırhonutho dsımla i malılto di wazirutho di baroyutho d’Amerika Morgan Ortagus sımla sturyo qaşyo li şıtonutho d’Turkiya u mırla en Erdoğan dımdawım ba itawyotho dıksoyım cama marıhbone inaqayo klozım dodıc  bi siyase du madınho mıscoyo gıdfoyış hiye lruhe, awkith a esore dkito acme gıdnuqsi.

Ortagus bu mamleyda mırla Erdoğan kodıc Hammas bi lista da marıhbone d’Amerika u du Huyodo d’Urifine mawxa lılklozım mdawım a itawyotho dkıtne acmaye.

Bu dumyano inaqa d’Erdoğan mdawım ba itawyothani u ba esore dkıtle cama marıhbone d’Hammas gıdkotıc a esore dıbritho me cal Turkiya u bebzabno kobe husrone li sbutho da Fleştoye.

Bi maqırhonutho dsımla Ortagus ftiho kımo l’Turkiya u l’Erdoğan u knuşyo dhawile cam mşale d’Hamas 22 bu yarho d’Ob latweyne maqıble lfuth i siyase d’Amerika.

Bıthır ma zuhorani d’Amerika dsımle u waziro di baroyutho d’Turkiya Mevlut Cavuşoğlu mahwele hfuxyo mqabıl du mamlano di wazirutho di baroyutho d’Amerika.