Amerika mbayanla 9.7 milyone dolare laşan usnodo da guboye du Iraq

U tukoso Amerikoyo du Quyomo Emwothoyo, mbayanle 9.7 milyone dolare lu snodo di şultonutho Iraqoyto, leşan dqudro dımtaybo guboye hire u kine.

 Bi maqırhonutho dfrısle USAİD mırle; Xıd remzo du snodo lu maşıqlo demoqratoyo du Iraq, Amerika gıdmqadmo i mcadronuthathe l’UNAMİ leşan dmitıstacmıli lu tuyobo da guboye du athro.

Lfuth i maqırhonutho dhuwle athmıl u tukoso Amerikoyo du Quyomo Emwothoyo-USAİD makadle dımbayanle 9.7 milyone dolare lu snodo du Iraq leşan dqodır dsoyım a guboyayde. Bi maqırhonuthayde USAİD mırle; U snodano dkobina l’Boğdod, leşan u maşıqlo demoqratoyoyo u lu snodo da fulhone dıgmisomi leşan a guboye gawonoye du athro d’şufci bi nihutho u kinutho.

USAİD mawdacle, bu snodano kiba i şultonutho d’Boğdod’ste dımşaçco u camo dmıştawtıf la guboyani bu athro kule, cal Woşington masırtoyo bu şudoyayda d’şumco la sniqwotho dkıtlın a Iraqoye ulu hefodo di moruthathe udi mşaynuthathe.

İmcadronuthathe gıdmitahwıyo l’UNAMİ b’2 maşıqle leşan u terkiwo da fulhone du Komisyon celoyo u şaryo da guboye bu haqlo di mtaksutho udu teknoloji. Bu maşıqlo qamoyo gıdmibayın 8 yadıcthone dgımcaqbi udgıısundi i hedriye da guboyani dıkmıntır dmisomi bu yarho d’Teşrin u qamoyo dıbqamuthayna.

Bu maşıqlo trayonoste gıdmıkle calu fulhone du kordinasyon udu tuyobo du sistem du hşowo da qole da guboyani. Ba 2 maşıqlani, frişste snodo la esore ulu mtoyo-lu komunikasyon leşan dmıxlıq tuxlono beyn du camo calu maşıqlo da guboye udi netiçathe. UNAMİ gıdmısnodo’ste bu tehqobo da nuqazyotho da sanduqe da guboye leşan dlo misım hile.