Amerika mbayanla şartat laşan dsındo Alzurfi

Amerika mbayanla şartat laşan dsındo u rişwazire Cadnan Alzurfi dgımşakıl i şultonutho hathto du Iraq.

Mbayn da şartat dımbayni, Amerika mawdacla d’Alzurfi klozım dnofıq mqabıl du fasad ud’soyım u sutoro da zedqe noşoye bu Iraq.

U waziro di baroyutho d’Amerika Mayk Pompeo, bi maqırhonutho dhule athmıl lu tboco froso, mawdacle du rişwazire du Iraq dhiw ele teklif dımşakıl i şultonutho hathto Cadnan Alzurfi, gıdqathle snodo mi mdabronutho d’Waşington umu kenşo emwothoyo, elo b’şart.

Bayn da şartat dımbaynile Pompeo, mawdacle d’Alzurfi gıdqathle u snodo dıklozım ida d’sonıd i morutho du Iraq dşore u haylo da grube mzayne kulle dıkmısnodi mu İran, ube bzabno klozım dnofıq mqabıl du fasad u dsoyım u sutoro da zedqe noşoye.

Alzurfi bu buyono dıfrısle athmıl, mawdacle dgımtayıb guboye hire u şafye bıthır mu şekolo di şultonutho hathto b’zabno d’şato.

Alzurfi makadleste dgıdfolıh laşan u zayno d’balhude dfoyış bidothıd di şultonutho, d’şore agrube mzayne udmaqwe u haylo di şultonutho.

U rişqutno du Iraq Barham Salıh athmıl hule teklif l’Cadnan Alzurfi dkıtwe u hiğmuno catiqo d’Alnajaf, dımşakıl i şultonutho hathto du Iraq b’zabno d’30 yawme.

Alzurfi kito b’qamuthe qetre mşahılfe, baynothaye dmoyıd u tuxlono du parlamento du Iraq bıthır mdımşakıl i şultonuthayde, dımbayın butja dkiba bsirutho ğalabe rabtho wu ulsoyo dkulle dqoyıs a’gefe da grube mzayne İranoye dhınne ne dıksaymi u duyoqo dcala şutose ruşmoye di şultonutho du Iraq. Wa grubani kımmathli hdo ma celotho asasi da tagılyotho camonoye du protesto dımşarewolın bi erişkoyto d’Boğdod u bğer hiğmonwotho mu yarho dı Teşrin u Qadmoyo uhul ucdo.