Amerika tlıbla mu Sin dobe fsoso dmisım buqore cali sbutho du virus di corona

Be bzabno, Amerika mawdacla dıtawtıryo lu Sin dobe fsoso la yadıcthone emwothoye dsaymi buhone bi mditho d’Wohan, laşan britho kula dıdco mayko mşarele u virusano u qatolo.

U waziro du sutoro d’Amerika du Pentagon Mark Esper, athmıl casriye sımle knuşyo mşawtfo lu tboco froso camu rişono di mdabronutho du gayso d’Amerika Mark Mily, cali sbutho di masirutho dkito bayn du Sin udu mabuco du virus d’Corona dıhsıdle hul ucdo zıd me 250 alfo farsufe b’athrawotho mşahılfe dıbritho, udımhele dharbo qşitho la hayle momunoye rabe dkulle dıbritho.

Esper bu mamlo dsımle mawdacle du Sin klozım d’obe fsoso lu kenşo emwothoyo ula yadıcthone dsaymi buhone ba n’arcothayde cali sbutho du mabuco du virus d’Corona, u mırle “klzoım u Sin d’obelan fsoso dcıbrina la n’arcothayde, dloqina a’kayiwe qamoye dkulle dıtafiwolın u kewo wa grube du hulmono dıksaymiwolın sımsomo celojo”.

Esper mawdacle ste di şultonutho d’Pekin klozım dımbatlo fayış dımnasyo dmaşfıro ruha qum da n’athrawotho dıbritho, udımşadrolın maskat hariwe dkımasrıti i fotho mu virus d’Corona.

Esper dmawdacle du Sin mu şuroyo latwe şariro bi sbuthathe, ba melani mdawamle “a’Sinoye dhowanwo şarire, methfathone u qrihe gıdobiwolan fsoso dmotinawo la n’arcothaththe, lo balhude la kayiwe, elo lu virus dkıtlın yo, bnişo dqıdrina dfıhminale”.

M’gabo hreno, u rişono di mdabronutho du gayso d’Amerika Mark Mily bu mamlo dsımle qrele u Sin li methfathonutho u mırle “tawtıryo du Sin dhowe methfathono la yadıcthone, ud’obe fsoso la mbahnone emwothoye dsaymi i wolithaththe, laşan britho dıdco şariroyith mayko mşarele u virusano”.