Amerika, walaw grışla sahmo ma folhayda me Suriya, kımdawmo dımşadro konvoye matcıne lojistik folhoyo la nuqazyothayda bu garbay madınho d’Suriya

HASAKEH, Suriya – U konvoyano dcabır mu qlimo d’Deyr Ezzor l’2 ma nuqazyotho dkıtle u koalisyon Emwothoyo bi Hasake, matcıno’we tawqıdotho, sisteme du tehqobo, radoyotho folhoye, zayne uğer lojistik folhoyo. A konvoyani kımdawmi dcubri lu garbay madınho d’Suriya, walaw u rişono Amerikoyo huwole amro dmıgrış 600 folhe me Suriya u dmısxır 3 nuqazyotho folhoye.

Elo a mşale folhoye d’Amerika’ste kımawdıci, du strateji wa fulhonathe lo mşahlıfi u kımdawmi bu garbay madınho d’Suriya. Bu tarano’ste, a helikoptere, a konvoye wa tayosyotho d’Amerika kımdawmi bu nqolo d’zayne u lojistik folhoyo lu qlimo u camathe’ste falqe d’şurone du çmanto, leşan u teqwiyo da nuqazyotho dkıtle u koalisyon Emwothoyo.

A konvoyani kmişadri, bu zabno di aykanoyutho di mşaynutho du macırbo d’Suriya kull dkothe kıhurwo uda taxtuşe beyn da hayle bnayqyomo d’Amerika-QASAD uda hayle dıkmısnodi me Turkiya, u cnufyo dkowe ba dukotho da Druz wa hçome du tukoso marhıbono d’Dacış dıkmdawmi b’dukotho frişe d’Suriya. Bu haqlo folitiqoyo’ste, heş lo mawdela Amerika bi şultonutho zabnoyto d’Ahmed al Şarıc dıklozım marhıq ruhe ma hayle d’Hayıt Tahrir al Şam.

Bu haqlo noşoyo udi mşaynutho’ste, dacır hol 82 alfo galwoye bıgawe du athro la dukothathe bu garbyo du athro-dilonoyith l’Afrin u hedora dkıtne kbişe ma hayle Turkoye uma noqufayda. Elo i aykanoyutho da dukothani’ste ğalabe harıwto’yo u camo dhariwi a botayde kıfayşi dlo duktho dfyoşo u lıkmotelın mcadronutho ma şutose ruşmoye du athro-i xalyuthathe kıfutho’ste qum d’Dacış dmaqwe naqla hreto ruhe.