I mtakasto d’Matibone Dlo Thume bu taşroro tibeloyo dıfrısla adyawma, mawdacla di hirutho di gelyenorutho bıbritho matyo ucdo li aykanoyutho bişto dkulle

I mtakasto d’Matibone Dlo Thume bu taşroro tibeloyo dıfrısla adyawma mırla “i aykanoyutho tibeloyto di hirutho di gelyenorutho bi şato da 2025 nafilo lu darğo bişo dkulle dhul ucdo. Zıd m’falgıd du menyono da comure dıbritho kcayşi adyawma b’athrawotho di aykanoyutho ebaye kımmathlo qento rabo cali gelyenorutho. I gelyenorutho şritho kuboyo b’xasritıd da rişone hakome dektator dıbritho”. 

I mtakasto d’Matibone Dlo Thume bu taşrorayda grışla ste u zuhoro cal Urifi dkımdawmo dfayşo i fnitho dkobo hul darğo celoyo aftho la gelyunore dsaymi a’fulhonaththe b’hirutho. 

U athro d’Norweç mıdle i qadmoyutho da n’athrawotho dkobın hirutho la gelyunore, ubıthır kothe u athro d’Estunia u Hollanda. 

Lfuth u statistic d’Matibone Dlo Thume, u Sin, Qore i Garbyoyto u Eriteria mıdlın u darğo nohuto dkulle bu haqlo di hirutho da gelyunore, u athın bu menyono da 178 hula 180 mbayn da n’athrawotho dıbritho. 

Camgabıdathe, u taşroro mawdacle di aykanoyutho da gelyunore tawtoyo balhude b’şawco athrawotho d’Urifi, u mathkarle ste di aykanoyutho mharhazto di mşaynutho, a’dyoşe da rişone hakome wu hboso momunoyo b’şıkıl dilonoyo kımmathli qetre la şutose du tboco froso dıbritho. 

I mdabronitho di mtakasto d’Matibone Dlo Thume Ania Österhaus mırla “inaqla dnışfi a’mabuce momunoye du tboco froso, manyo dgıdmagle cala mawdcınwotho dlatne şarire ucali propaganda dkıtyo saxta?. Camgabıd du ağuno yawmonoyo dkobinale laşan di mşaynutho da gelyunore, kfılhina ste laşan dmaqwena a’şetısyotho momunoye di gelyenorutho”. 

U taşroro d’Matibone Dlo Thume grışle ste u zuhoro cala şutose du tboco froso dkobın ağuno aminoyo laşan dmamtın i wolithaththe li duktho b’160 athrawotho dıbritho.