Arbco manabne du cameydan nqili mahayani mu virus di Corona

U virus d’Corona, kımdawım dhowe celtho lu mawto dan abne du camaydan. Ucdoste 3 manabne du camaydan du Iraq dtafiwolın u kewano, nqili ma haye.

Bi mditho d’Eskilstuna du Swedste, mvayacle farsufo hreno mu camaydan a hayayde mu virusano d’Corona.

 Bi arişkoyto du Iraq Boğdod, tafi bi şabthathe u virus d’Corona bı şıkıl dlıkmıntarwo l’ğalabe farsufe, bıthır mıd mid fusqono dmitaqım u karanten u mnoco du cboro u nfoqo cboro b’gawe di mditho. Bi netije, a comure d’Boğdod qayıthlın i şabthathe husrono rabo, beynothaye 3 mu camaydan nqili ma haye bıthır mıd tafilın u virus d’Corona.

İ cito di İqartho Mqadaşto di marcitho Kaldoyto d’Boğdod, mawdacla di mşamşonithayda i claymtho Raşa Thamer nqilo ma hayani b’cımro d’37 ışne mi celtho du kewo d’Corona. U bıthır matheste mawdıc d’gabro mu camaydan d’Boğdod dışme Camer Cabbo İbrahim mhase bıthır me kmo yawme dtafile u virus, ube bzabno farsufo hreno mu camaydan d’Boğdod dkıtwe rabhaylawotho mşawtbo, nqil ma hayani yawme dıtlotho dşaficina mi celtho d’Corona.

İ fatıryarxutho di cito Kaldoyto d’Boğdod, bu manşur dfrıswola bi dafayda mawdacwola du menyono du camaydan dtafilın u virus d’Corona zayıd. U mawxa i fatıryarxutho tlıbla ma mhaymıne dhowın b’zuhoro rabo bu mazlo mathyo li cito bıthır mıd mıdle u Iraq fusqono dmitaqım u karanten a tedbire dmahti mqabıl du kewo d’Corona.

Me gabo hreno bi mdito d’Eskilstuna du Swed nqil ma hayani George Yuhanın dımawladwo bi qritho d’Tel Tamer bi şato dan 1962, me abohe Malke Sawme Yuhanın mi iqartho d’be Brahim dkıtne mu şerşo mi qritho d’Bethqustan d’Turabdin u Ziyane mi iqartho d’Be Hınno Arkahoye.

U monhnafşo du George bıthır mıd mkamele u yulfoneyde bu haqlo huquq mşawtafwole a hayeyde cam Basma i bartho Malke Çerçis mi Hasake bi şato da 1979 umu zuwoğano hawilın 2 bnotho. Bi şato da 2015 mgalwewole cami iqartheyde lu Swed u hoyınwo bi mdito d’Eskilstuna. U mnoho nafşo bıthır mıd qayıwthwole u kewo di Corona 4 bu yarho d’Nison, nqil ma hayani 20 bu yarhano d’İyor ba bethkrihe.