Armenya adşato lıssımla hfitwotho cali ruho da sohde du Sayfo

A’zage da citotho kulle nqışlın wa bahre da zabuqone d’Yerivan uda mdinotho hrene matfın athmıl l’zabno dı tloth qatinotho, bi cohnutho da 105 ışne du qtolğenso da n’Armınoye di şato da na’1915.

Adşato b’Armenya lıssim hfitwotho cali ruho da sohde, mi celtho da tedbire dkito mqabıl du virus d’Corona.

Athmıl casriye u athro d’Armenya matfele abahre ba dukotho gawonoye, bi cohnutho du qtolğenso da 1915. A zawhe dımtaybila Armenya adşato mşahılfe ma nışne dşaficina, mi celtho da tedbire du nfoqo mqabıl du kewo d’Corona.

Bu taro da zawhani, u rişwazire di şultonutho d’Armenya Nikol Paşinyan wu fatıryarxo di cito Armınoyto Mor Karekin Trayono, mahıtlın klile d’warde cali qoyumtho da sohde Armınoye dkıtyo bi erişkoyto d’Yerivan.

U halxo da şroğe dıkmitayabwo 23 bu yarho d’Nison mkul şato, adşato maqım mi holo mi celtho d’Corona, ube bzabno sxiri a’darbone rişoye dıkmawbıli li qoyumtho da sohde Armınoye.

Mdarbıd da zawhe dıkmisomiwo kul şato, adşato matfın a’bahre gawonoye u nqışlın a’zage da citotho kulle d’Armenya. Elo i erişkoyto Yerivan cayişo l’azbno dı tltoh qatinotho b’cutmo qşitho, cal da comurayda matfelınste a’bahre da botaththe, u maqıthlın mdarbaye a’şamce.

U rişqutno d’Armenya Armen Sarkisyan bi maqırhonutho dhule mırle ”u duxrono da’105 ışne du haşano kmisım adşato b’zawhe frişe mi celtho du habo du kewo. A’debhe du qtolğenso kmathkırinalın kul zabno ubkul duktho”.

Camgabıdathe, Sarkisyan bu mamlayde athmıl makadle di sbutho dmıctarfo Turkiya bu qtolğenso da na’1915 sbutho di mşaynuthoyo li umtho d’Armenya uli fnitho.