Atagliyotho b’Amerika kımdawmi mqabıl da hjome dıkseymi a pwelıs

U hfuxyo mqabıl du qatlo du claymo komo George Floyd mu polis Amerikoyo, mbarbız bımdinotho frişe d’Amerika.

 Ba tagliyotho dsimi bhol 30 mdinotho frişe du athro, mıstacmele u polis haylo u cnufyo qaşyo mqabıl du camo.

 3 farsufe qtili ba tagliyothani dımbarbızi lhol 30 mdinotho frişe d’Amerika ubıı qaşyutho krih u cnufyo dıkmıstacmıl u polis mqabıl da mtagliyone. Leşan dmitaklın a tagliyothani’ste, manhıt hol 10 alfo hayle di mşaynutho d’Amerika la zabuqone.

 Atagliyothani qaşın dilonoyith bi mdito d’Minneapolis dkıtyo i mdito dı qtılwo eba u claymo komo George Floyd meqım kmo yawme. Mawdıc’ste d’radoyto du polis qlıcla baroyo beyn du camo bi mdito d’New York u mıstacmıl ğaz da damce bu camo.

 Ğalabe ma rişone da mdinothani’ste grışlın u zuhoro da comure dlo nufqi larwal u sim iclan aykanoyutho şnızto b’25 mdinotho u msik hol 1.400 mtagliyone b’17 mdinotho frişe. Bu mamlo dsımle athmıl Trump b’Florida mırle; U mawto d’Floyd mlele lebe dan Amerikoye bı haşo rabo ubı ruğzo. Ono hawro lkull Amerikoyo dkobıc u şlomo’yo elo lıkobno aftho lu tehriwano dkowe ma anarşist.