Aziz Arsan nqil ma haye bu athro d’Almanya

Aziz Arsan dıkhoyewo b’Göppingen d’Almanya, nqil ma hayani a zabnoye, l’haye aminoye. Holo Aziz Arsan dkıtwe mi qritho mbaraxto d’Arbo b’Turkabdin, mi celtho di çalta dhawyo bu meho, macmasle caynothe li brithathe.

Aziz Arsan, u cammo di rişonitho du Huyodo da Neşe d’Bethnahrin-Şmuni Arsan udu mşalo di methtaksonutho d’MUB u fırco d’Göppingen Yahkub Arsanwe.

Yawme d’Şabtho dşafıcina, nqil farsufo hreno man abne du camaydan ma hayayani a zabnoye. Holo Aziz Arsan, qayıthwole çalta du meho u baroyo nqılwo li bethkrihe u sımwo camaliye, elo a osawotho lo qadiri dmaxlısile u adyawma safrayto, nqil ma hayani. U holo Aziz mawladwo ban 1954 bi qritho d’Arbo b’Turkabdin me abohe Musa u Hawo Arsan u kıtwole 8 ahunone u ahwotho.

U mhasyo mzawağwo cam Nura Demir umu zwoğano hawilın 4 nacime u kıtwole  nubğe u nacime da nubğe. U mhasyo cami iqarthayde mgalwewolın l’Almanya ban 1979 u rakıwiwo b’Göppingen. Mhasyo Aziz Arsan ba eşne qamoye, hfitowe ba fulhone di cito u hemste du hudro d’Göppingen, u sımwole zabno i mşaluthathe.

Bu zabno du qrobo gawoyo d’Juguslavia’ste, mşaçacwole u camaydan dmalım mcadronutho la sniqoye u bıthır, huwe bide d’ruhe azze l’Juguslavia u mfaraqwole i mcadronuthathe dmalimowa b’Göppinen. U holo Aziz, rahomo du camayde udu athrayde’we u mıştawtafle ğalabe naqlat la hfitwotho du Mawtbo Umthoyo d’Bethnahrin wu hadomo du froshezwo d’Suroyotv’we.

Cali wasiyaydeste, gıdmınqıl u fağro du mhasyo li qritho d’Arbo u gıdmicafe su babayde ba bethqbure di cito d’Mor Şalito.U mnohnafşo Aziz Arsan u cammo di rişonitho du Huyodo da Neşe d’Bethnahrin-Şmuni Arsan udu mşalo di methtaksonutho d’MUB u fırco d’Göppingen Yahkub Arsan’we. İ iqartho dbe Arsan kula, mqadamla a tahınyothayda li asirutho dmahıwoyo u lkull man dımhasele u mnoho Aziz Arsan.