Barham Salıh mawdacle klozım i şıltonutho du qlimo d’Kurdistan dımşarıro a talabe da mtagılyone

 U rişqutno du Iraq Barham Salıh, mawdacle dıklozım i şultonutho du qlimo d’Kurdistan dımşarıro atalabe da mtagılyone, udımqafyo şroye şerşoye li sbutho da nağre u di aykanoyutho haruto di ciyeşe.

 Camgabıdathe, i mathlonutho d’Emwotho Mhaydotho bu Iraq krıhla u cnufyo dıkmitıstacmıl mqabıl da mtagılyone di Slemaniye, u tlıbla mi şultonutho d’Arbil dsaymo u sutoro du zedqo du kunoşo udu renyo hiro.

 U rişqutno du Iraq Barham Salıh, bu hfuxyo dmahwele cala gedşe haroye dhawın bi hiğmonutho di Slemaniye mırle “klozım i şultonutho du qlimo d’Kurdistan dımşarrıro a’talabe da mtagılyone, udfılho laşan dmiqafe şroyo şerşoyo li sbutho da n’ağre da mcaşe udi aykanoyutho haruto di ciyeşe. Mawxa i şultonutho klozım dımhalqo dawsat çıddi u msarhıbe, udımbayno a’yuthrone du camo li mşablonutho da bnaymothoye du qlimo”.

Salıh dkıtyo hadomo bi mdabronutho du gabo du huyodo athronoyo d’Kurdistan, mawdacle ste du cnufyo latyo şroyo laşan dmınfıq mqabıl da talabe qonunoye da mtagılyone, uba melani mdawamle “klozım dmiqadım b’iqoro lu sebyono ula talabe da mtagılyone mşayne, uktılbina ma haylawotho di mşaynutho dımqadmi lfuth u qonuno udmarıhqi mu cnufyo”.

Bebzabno, Salıh sımle qroyto la bnaymothoye du qlimo, dımyaqri a’haylawotho di mşaynutho udnıfqi moro li mşaynutho ula mulkone gawonoye.

Mxasra hreto, i mathlonutho d’Emwotho Mhaydotho bu Iraq bu buyono dıfrısla athmıl, krıhla u cnufyo dhawi ba tagılyotho haroye du protesto dhawın bi hiğmonutho di Slemaniye, udıtqil udımçarıh ebaye menyono dı mtagılyone udhawın celtho du shofo d’hın mulkone.

İ mathlonutho emwothoyto bu buyonayda makadlaste dıklozım dmiamın u sutoro du zedqo da tagılyotho mşayne, u mawdacla da tagılyotho ste klozım dfayşi mşayne, u hawxa mdawamla “klozım dmitahwe fsoso la şutose du tboco froso d’obın tebe b’hirutho dlo hboso, uklozım baroyo dmitabde buqore, bnişo dmibayni a’hayobe dkıtne mşale calu cnufyo udmimıd hşowo menaye”.

Camgabıdathe, i mathlonutho d’Emwotho Mhaydotho bu Iraq sımla qroyto li şalyutho, u tlıblaste mi şultonutho du qlimo d’Kurdistan dnıfqo moro li hirutho du kunoşo udu renyo hiro.