U camaydan dıkhoye bi mditho Suryoyto d’Bağdede di daşto d’Ninwe kmoyıd u vaxin du virus d’Corona

U camaydan dıkhoye bi mditho Suryoyto d’Bağdede di daşto d’Ninwe, kfix la qentrune du hulmono laşan dmoyıd u vaxin du virus d’Corona.

Lfuth u qaymaqam d’Bağdede, zıd m’800 farsufe kmitahwelın u vaxin yawmonoyith.

U qaymaqam di qastra Suryoyto di daşto d’Ninwe Cisam Bahnam Matti, bi maqırhonutho dhule lu tboco froso du camaydan, mawdacle da bnaymothoye d’Bağdede b’şıkıl rabo kmıkfoxi la qentrune du hulmono, laşan dmitahwelın u vaxin du virus d’Corona.

Matti mawdacle ste du vaxin kmitahwe b’şıkıl yawmonoyo l’hedor 850 farsufe ma comure d’Bağdede, u mathkarle du qedomo da barmothoye li sbuthathe athi luhwoyo bi netiçe di kampanya rwıhto du tenhiro dmabdiyowa ma grube du hulmono bi rocyutho di dayira du hulmono d’Ninwe, u camgabıdathe ste menyono ma şutose di şultonutho u rişone tawdithoye da citotho u masığde mıştacelın dawro msimono, u mşaçaclın a’bnaymothoye d’Bağdede dmaydi u vaxin, bnişo dmınfıq moro lu hulmonaththe uli mşaynutho du kenşo.

Bebzabno, u qaymaqam Cisam Matti grışle u zuhoro cala socurwotho dsımle ba yawme haroyani l’menyono ma qentrune du hulmono, bnişo dmıkle cali tahrazto di methtaksonutho di mdabronutho da qentrune, u mqadamle ste a’tawdiyothayde la osye ula falohe bu haqlo du hulmono kulle dsımlın u mede dıknofıl aclaye, bnişo dmakşıro i kampanya du tehwiyo du vaxin d’Corona.