Barıtle malyo ma surotho d’Qassem Suleymani

İ mdito Suryoyto d’Barıtle bi daşto d’Ninwe, kull dkothe kmıcjoqo ma surotho da rişone folhoye du İran u dı Alhaşd Alşacbi.

 Alhaşd Alşacbi wu İran kmahwe dılo makfele u kboşo da mdinotho rabe du Iraq, kıbciste dımşahılfi i hiyoyutho Suryoyto d’Barıtle.

 U şufro di mdito d’Barıtle wi zahyuthayda, kul dkothe kmıtloyo bıthır da surotho du tahlufo du rişono di sictho d’Alhaşd Alşacbi Abu Mahdi Almuhandes udu rişono d’Faylaq Alquds da Noture du Qawmo du İran Qasem Sulaymani dqtiliwo b’cuqobo dsımwola Amerika cali radaytathe ba 2020 qariwo lu bethtawso Emwothoyo d’Boğdod.

Bu darbo rişoyo du cboro li mdito d’Barıtle, kmibarbızi bşıkılat u bı yurwo mşahılfo a surotho da 2 farsufani dkıtwın a mbaynone di tarmitho du İran bu Madınho Mescoyo awkith bu Iraq, b’Suriya, b’Lebnon ubu Yemen. A 2 farsufani dkıtwın bi lohitho di marıhbonutho d’Amerika, bu darbo du snodo folhoyo, folitiqoyo u momunoyo dıkmqadmiwo la Maşılmone Şica Şabak, kımnasanwo dımşahılfiwo i demoğrafya da fenyotho du camaydan di daşto d’Ninwe.

Camgabıdathe, u şuro baroyo di cito makthabzabnoyto dan Arbıci sohde dkıtyo mqabıl du darbo rişoyo du cboro l’Barıtle, mcalıq acle lohiyotho d’buyoye da 2 marhıbone Sulaymani u Almuhandes, u bebzabno layto calu şurano ulo lohitho dıkgurşo u zuhoro cali citathe dkıtyo ucdo xlitho.