26/03/2025

Bı mıştawtfonutho rabtho rışmoyto u camonoyto, sim bu athro d’Lebnon u zawho di masırhonutho di Mor Basilyos Josef mafıryono hatho li cito Suryoyto Ortodoksoyto bu Hınd

26/03/2025

CATSHANE, Lebanon – B’zawho ruhonoyo makthabzabnoyo rabo, i cito Suryoyto Ortodoksoyto d’Antiyuxiya masrahla i tubthonutho d’Mor Basilyos Josef mafıryono hatho lu Hınd, bu syomido di qadişutho du fatıryarxo Mor İğnatiyos Afrem Trayono ubi methcadronutho da hsayo mcalayo a’hadome di Sunados Mqadaşto di cito.

Bu zawhano dımtayıb bi cito d’Yuldath Aloho bi fnitho di Catşane b’Lebnon, fatıryarxo Mor Afrem bu mamlo dsımle, mahkele cala n’esore makthabzabnoye dıkmasri i cito Suryoyto du Hınd camu kursiyo şlihoyo mqadşo d’Antiyuxiya. An’esorani dıkdıcri lu zabno di bişara du şliho Mor Tuma bu şuroyo di Mşihoyutho ulu zabno di golutho da Suryoye Mşihoye lu athro du Hınd bu doro da n’arbıco. İ qadişuthayde dım’akadle calu dawro mqadşo dkıtle u mafıryono bu nfoqo du moro la mhaymne uli hdoyutho di cito, mşaçacle ste u mafıryono hatho Mor Basilyos Josef dımdabır i cito Suryoyto du Hınd b’hexamtho ub’makixutho, udımdawım dfoyış mhaydo camu kursiyo d’Antiyuxiya, udsoyım i wolithayde b’hubo ub’kuşoro. 

M’gabo hreno, u mafıryono Mor Basilyos Josef bu mamlayde mqalasle u snodo dmahwe ele mu rişwazire du Hınd umu rişqutno d’Lebnon uma rişone da citotho ahwotho dıbritho. İ tubthonuthayde dhule şudoyo dgıdnofıq moro li haymonutho uli mşablonutho du camo mırle ste “kobeno şudoyo dgıdnofaqno moro lu tuxlono dhuleliyo u kursiyo şlihoyo wu camaydi”. Ubu huthomo du mamlayde, Mor Basilyos tlıble dmitarku u şlomo wi şalyutho bıbritho udilonoyith bu madınho mescoyo, u mqadamle ste tahanyotho lebonoye li iqarthayde ula n’abne di cito Suryoyto kulle du Hınd.

Lu zawhano di masırhonutho, mıştawtafle qoyumo İbrahim Kancan xıd mathlono du rişqutno d’Lebnon Josef Caun, taşdarto mi şultonutho du Hınd, menyono celoyo ma fatıryarxe da citotho du camaydan cam rişone d’citotho hrene ahwotho wa mathlonaththe, uba mowat ma n’abne di cito Suryoyto du Hınd ud’Lebnon ud’athın m’athrawotho mşahılfe dıbritho laşan dmıştawtıfi lu zawhano u makthabzabnoyo.